Nga Boldnews.al
Italiani kontrovers Carlo Bollino vijon të jetë një shërbëtor i rregullt i pushtetit aktual. Nëpërmjet dy mediave të tij, Shqiptarja.com dhe Report TV, Bollino ka sulmuar themeluesin e LIBRA-s, Ben Blushi, i cili nijhet edhe si një nga kritikët më të ashpër të qeverisë “Rama”.
Në një shkrim të Shqiptarja.com e kthyer edhe në kronikë televizive më pas në Report TV, Bollino kritikon deputetin Blushi duke pretenduar se ky i fundit ka “tradhëtuar” mbështetësit pasi është vetëzgjedhur si kryetar i LIBRA-s. Duke u bazuar tek vendimi i Gjykatës e Tiranës për regjistrimin e partisë, Shqiptarja.com kërkon të manipulojë publikun se brenda kësaj force politike mungon transparenca. Madje duke i shtuar edhe nota besimi, thuhet se Blushi po vepron njësoj si kryetari i PS, Edi Rama.
Por në fakt, përveçse një keqdashje për të njollosur një forcë të re politike, Bollino në rastin më të keq mund të quhet një shpifës dhe në rastin më të mirë një gazetar i shndërruar në shërbëtor të pushtetit. Zgjedhjet në LIBRA nuk janë zhvilluar pasi kjo parti ka pak ditë që është krijuar. Përveç kësaj, ata që e cilësojnë veten si gazetarë të politikës në mediat e Bollinos, duhet të dinë që regjistrimi në gjykatë të një partie kërkon një kryetar.
Pra, z. Ben Blushi është zgjedhur përkohësisht nga një bërthamë prej 31 vetash si kryetari i LIBRA-s, pasi një lëvizje politike duhet të ketë një drejtim të përkohëshëm derisa të shkojë në zgjedhje të brendshme. Deri më sot nuk është parë apo dëgjuar as në Shqipëri dhe as në ndonjë vend të botës, që një parti të krijohet pa një kryetar të përkohëshëm.
Këtë e sqaroi edhe në një status në facebook, deputetja e LIBRA-s Mimoza Hafizi. “LIBRA është themeluar në muajin tetor nga një grup i madh nismëtar, në përputhje me ligjin për partitë politike. Organet e para drejtuese, ku bën pjesë edhe kryetari, janë zgjedhur nga ky grup themelues nismëtar. Ato janë organe të përkohshme, që kanë për detyrë organizimin e LIBRAs deri në zgjedhjet e para të brendshme. LIBRA do të organizojë, brenda pak muajsh, zgjedhjet demokratike për të gjitha organet drejtuese, përfshirë dhe kryetarin, bazuar në statutin e saj që garanton pjesëmarrje të lirë e të barabartë të të gjithë anëtarëve.”
Edhe pse vjen nga një vend si Italia, ku mediat më në zë janë gjithmonë në opozitë, Bollino duket se është shqiptarizuar më tepër se ç’duhet. Ai urdhëron gazetarët që punojnë për të, që të ndjekin në çdo hap kryeministrin Rama, kryebashkiakun Veliaj dhe shumë “të rilindur” të tjerë.
Por përveç shërbëtorit, Bollino luan edhe rolin e intrigantit duke sulmuar të gjithë kundërshtarët e Ramës. Kjo natyrisht që e ka një shpjegim, pasi është një nga përfituesit e pasurive publike duke marrë nën administrim “Bunk’Art” dhe “Bunk’Art2”.
