Analisti dhe publicisti shqiptar Andrea Stefani ka ndërruar jetë sot pas një sëmundje të rëndë.
Z. Stefani vuante prej disa muajsh nga një sëmundje e rëndë. Ai ishte prekur nga një tumor në stomak. Për fat të keq, kimioterapia e ndjekur në një spital në Romë nuk dha efektet e pritshme.
Andrea Stefani kishte mbi 20 vjet që punonte si gazetar dhe opinionist në organe të ndryshme të medias shqiptare. Njihet për qëndrimet dhe pikëpamjet jo konformiste me pushtetet e radhës në Shqipëri.
Dimensionit të tij si gazetar i bashkangjitet edhe aktivizmi i theksuar veçanërisht në përpjekjet qytetare kundër korrupsionit dhe dominimit autoritarist të shtetit.
Ka qenë kryeredaktori themelues i së përditshmes “Shekulli” dhe për shumë vjet drejtues i programit investigativ antikorrupsion “Hapur”. Për më shumë se 10 vjet ka qenë i pranishëm në debatet e përjavshme televizive. Eshtë autor i librit publicistik “Albanistan”.
Stafi i Boldnews.al shpreh ngushëllimet për familjen Stefani.
