Nga Boldnews.al
Kryebashkiaku Erion Veliaj zhvilloi një mbledhje në Tiranë me kryetarët e Bashkive shqiptare në Ballkan. Por si organizator i këtij takimi, Veliaj i dërgoi ata për të parë “Bunk’Art 1” dhe “Bunk’Art” 2 që administrohen nga italiani i natyralizuar Carlo Bollino.
Kjo reklamë e bizneseve të mikut të Veliajt, i ka vënë në siklet kryetarët e Komunave të Prishtinës, Tetovës, Preshevës dhe më gjerë. Të lodhur nga rruga e gjatë dhe takimet në Tiranë, kryebashkiakët e Ballkanit nuk i kanë patur me shumë dëshirë vizitat në bunkerët e Carlo Bollinos.
Njësoj si tek inagurimi, këto vizita u servirën nga mediat e Carlo Bollinos, Report TV dhe Shqiptarja.com ndërsa nuk u lejuan kamerat dhe gazetarët e mediave të tjera. Me superlativa, Veliaj mbajti edhe një fjalim nga “Bunk’Art 2” duke vlerësuar të dy monumentet por edhe mikun e tij Bollino i cili sipas tij po kryen një menaxhim të shkëlqyer.
“Unë kam parë dhe punën e shkëlqyer tek bunkeri tjetër dhe më vjen mirë që e kujtojmë historinë. Shumë prej kolegëve që kanë dëgjuar jashtë kufijve të Shqipërisë mbi paranojën dhe investimin monumental që shteti shqiptar ka bërë në vepra të tilla, sigurisht janë të mahnitur. Për të gjithë ata që me histeri u munduan të prishnin bunkerin me protesta kuptuan që nga historia, nga mësimi i historisë nuk ka gjetur kush keq. Përkundrazi, injoranca e dhunës mbi të kaluarën nuk ka sjellë ndonjë përfitim.“- deklaroi Veliaj.
Mes lodhjes dhe dëshirës së sforcuar të këtyre vizitave, kryebashkiakët e Ballkanit panë disa nga dhomat ku gjenden të ekspozuara dokumente dhe fakte tronditëse që tregojnë vuajtjet dhe persekutimin e popullit shqiptar gjatë diktaturës komuniste, e cila ndau dhe shqiptarët përtej kufijve.
Me këto vizita kryetari i Bashkisë së Tiranës tregon se përkushtueshmëri për marketingun e dy bunkerëve të Carlo Bollinos. Miqësia mes Veliajt dhe Bollinos, por edhe mes grave respektive është shumë e njohur në Tiranë. Ata shpesh janë fotografuar duke bërë pushime në disa qytete të Europës.
Por përveç pushimeve, sëbashku ata shkojnë edhe për punë. Boldnews.al zbuloi sesi kryebashkiaku Erion Veliaj realizoi një marrëveshje me Bashkinë e Veronës për pastrimin e Tiranës, por nën bekimin e italianit kontrovers Carlo Bollino.
