Deputeti dhe themeluesi i LIBRA-s Ben Blushi ka komentuar në faqen e tij në Facebook, vendimin e dy forcave kryesore të maxhorancës, PS e LSI për mos e futur as nesër në parlament dekretin e Nishanit kundër ligjit të plehrave.
Ai akuzon LSI se po bën pazare me disa vende pune për t’i dhënë votat PS që ligji të kalojë. “Rilindja ka frikë nga kazanët, LSI ka frikë nga Rilindja”, thote Blushi.
JA CFARE SHKRUAN BLUSHI
PËR IMPORTIN E MBETJEVE
Dekreti i Presidentit që rrëzon ligjin e importit të mbetjeve nuk vjen as nesër në parlament sic ishte parashikuar. Rilindja dhe LSI duan ta shtyjnë sepse nuk kanë votat. Po negociojnë disa vende pune derisa të bëhen 71 në Kuvend. Ju kisha thënë miqve ambjentalistë të mos kenë shpresë tek ata që premtuan se do ta rrëzojnë ligjin. Cfarë partie! Kanë shumë frikë ta votojnë, kanë po aq frikë ta rrëzojnë. Rilindja ka frikë nga kazanët, LSI ka frikë nga Rilindja. Në fakt kanë frikë nga e njëjta gjë. Megjithatë edhe kaq është një fitore e vogël: ligj per importin e mbetjeve nuk ka! Ose më saktë importi i mbetjeve lejohet, pa ligj,vetëm në një pjesë të territorit të vendit: në Kuvendin e Republikës së Shqipërisë!
