Nga Boldnews.al
Italiani kontrovers, pronar i disa mediave në Shqipëri dhe i njohur për lidhjet e tij me qeverinë, ka arritur të marrë në administrim edhe “Bunk’Art 2” që u inagurua një ditë më parë. Në ceremoni ishin të pranishëm kryeministri Rama, Ministri i Brendshëm Saimir Tahiri, deputë të mazhorancës ndërsa ra në sy edhe prania e Carlo Bollinos.
Por Bollino nuk ishte aq i rastësishëm, pasi “Bunk’Art 2”, ashtu si “Bunk’Art 1” në ish bunkerin atomik të Komitetit Qendror, do të administrohet nga italiani i shqiptarizuar. Qeveria ende nuk ka bërë publike asnjë dokument për këtë, por Boldnews.al mëson se Bollino është kujdesur deri në detaje për sistemimin e brendshëm të këtij muzeu. Nuk dihet nëse punimet janë kryer nga “Spazio Eventi Albania”, një kompani italiane e lidhur me Bollinon që kreu punimet e “Bunk’Art 1”.
Ndërkohë në ceremoninë e djeshme të inagurimi të “Bunk’Art 2” nuk u lejuan madje as mediat e tjera që të filmonim hapjen e këtij monumenti që simbolizon diktaturën, dhunën, persekutimin dhe natyrisht burgosjen e fjalës së lirë.
Prania e Bollinos dhe përjashtimi i mediave të tjera të pavarura nga ky aktivitet është skandaloze. Vetëm “Report Tv” dhe gazetarë të “Shqiptarja.com”, të dy media në pronësi të Bollinos, u lejuan që të merrnin filmime dhe foto gjatë hapjes së “Bunk’Art 2”.
Të kontrollosh median e pavaruar, ndërkohë që përkrah një media të debatuar e të financuar nga paratë publike është në kundërshtim të drejtpërdrejtë me atë që çdo muze që përkujton një diktaturë përfaqëson.
Ky është bunkeri i dytë që merr nën administrim Carlo Bollino. Në pranverë të këtij viti, ai morri në heshtje edhe “Bunk’Art 1”, ish-bunkerin për mbrojtje atomike që në vitin 2014 u shndërrua në një muze turistik. Bollino përdorin një OJF të quajtur “Qendra URA” për të marrë nën administrim veprën e famshme. Por mediat zbuluan se “Qendra URA”, kjo OJF drejtohet nga zonjat Admirina Peçi, kërkuese historike dhe Irma Gordani, Financiere.
Zonja Peçi është redaktore në median Report-Shqiptarja.com të biznesmenit italian Carlo Bollino, ndërsa znj.Gordani ka qenë përfaqësuese ligjore e televizionit të Bollinos.
Kalimi i “Bunk’Art 1” dhe “Bunk’Art 2” në administrim të Carlo Bollinos ka qenë një operacion i kryer në mungesë të plotë transparence dhe i pashpallur nga autoritetet publike, siç ligji e kërkon.
Duket se këto dy monumente kulture, nga një simbol i shndërrimit të bunkerit atomik në qendër turistike, po kthehen në simbol të shndërrimit të një projekti kombëtar në marifet për të kapur median dhe për të favorizuar botuesit mediatikë si z. Bollino.
