I njohur ndryshe si “Komisari i hekurt”, Edmond Koseni, ish-drejtori i policisë së Elbasanit në vitin 1998-2001 do të tregojë për të gjithë betejën e tij ligjore pas pezullimit nga detyra për akuzën e “torturës me pasoja të rënda” në bashkëpunim, në një intervistë për emisionin “Në fokus” të gazetarit Nertil Agalliu.
Me urdhër që mban nr 3727 të datës 23 dhjetor 2001 ministri i Rendit publik i asaj kohe e pezulloi nga detyra deri në përfundim të çështjes penale dhe për Kosenin ishte një kurth.
“Ishte kurth. Nuk ka shanse që një drejtor policie, me këtë gradë që kam unë. Kam dalë oficer 21 vjeç, kam qenë në degën e brendshme të Ersekës 4 vjet dhe në gjithë karrierën time nuk kam një këshillim në dosje.
Nuk mundet që një drejtor policie të konsumojë torturën në bashkëpunim”, thotë ai.
Në atë kohë ka pasur edhe nga ata që ankoheshin për presione, dhe Koseni përgjigjet:
“Unë i jam drejtuar disa herë popullit në televizion lokal. Në rast se ju kërkojnë diçka punonjës policie apo njerëz të mi hajdeni ankohuni dhe shikoni nëse do ju jap të drejtën apo jo. E do shqip ti unë kam futur dhëndrin e xhajës tim në burg”.
Sot Gjykata e Tiranës nxori një urdhër ekzekutimi për rikthimin në detyrë të Edmond Kosenit, ndërsa pak ditë më parë po me vendim të Gjykatës së Tiranës, Koseni fitoi të drejtën për të marrë të gjitha pagat që nga koha kur ishte pezulluar nga detyra.
Vendimi i sotëm i detyron Ministrinë e Brendshme dhe Policinë e Shtetit ta sistemojë Kosenin në të njëjtin pozicion që kishte përpara pezullimit.
