Ambasadorja e Bashkimit Europian në Tiranë, Romana Vlahutin është përplasur me Kryetaren e Komisionit për Punën dhe Çështjet Sociale Albana Vokshi lidhur me censurën në media dhe punësimin e të miturëve.
Gjatë pjesëmarrjes në Këshillin e Integrimit, teksa diskutohej për raport-progresin e KE për Shqipërinë, Vokshi iu drejtua ambasadores Vlahutin nëse kishte një qëndrimin për shfrytëzimin e fëmijëve dhe grave në Landfillin e Sharrës, në Tiranë.
Vokshi: BE ka financuar landfillin e Sharrës, a e keni monitoruar ndërmarrjen e Bashkisë Tiranë që keni financuar? A keni nje qendrim për shfrytëzimin e fëmijëve dhe grave për punë të rënda dhe të papaguara. Aty kanë humbur jetën në rrethana ç’njerëzore një fëmijë 17 vjec dhe një grua 42 vjeçe. Të dyja krimet u zbuluan nga investigimet e gazetarëve që u pushuan nga puna dhe iu mbyllën emisionet e portalet.
Vlahutin: E kam degjur ngjarjen në Sharrë. Të drejtat e grave dhe fëmijëve janë të rëndësishme për BE-në.
Vokshi: Ngjarja e Sharrës është krim shtetëror. Shfrytëzimi i fëmijëve dhe grave ka ndodhur në një ndërmarrje shtetërore në administrim të Bashkisë së Tiranës.
Duke folur për lirinë e mediave, Vokshi i kërkoi ambasadores së BE nëse i ka reflektuar në progres-raport pushimin e gazetares Alida Tota, mbylljen e emisionit Públicus, mbylljen e portalit Hashtag dhe presionin ndaj mediave të cilët investiguan aferën korruptive në Landfillin e Sharrës.
Vokshi: Flisni për lirine e mediave, por sot kemi një gazetare të pushuar për një investigim, një emision të mbyllur Públicus, disa portale të mbyllura. A janë këto standarde të BE?
Vlahutin: E kam takuar edhe gazetaren Alida Tota, e pushuar nga puna pas investigimit. E kam dëgjuar. Kam nevojë për më shumë fakte. Liria e mediave është e rëndësishme. Duhet së bashku të punojmë. Të drejtat e grave dhe fëmijëve janë të rëndësishme për BE-në.
Gjatë debatit, deputetja socialiste Arta Dade ka tentuar të sfumojë fjalën e deputetes Albana Vokshi duke rkthyer në vëmendje tragjedinë e ndodhur në Gërdec në vitin 2008.
Nga Boldnews.al
