Ministri i Drejtësisë, Ylli Manjani ka deklaruar ditën e sotme se burgu i Zaharsisë, ku mbahen të izoluar të dënuarit me probleme mendore, do të mbyllet.
Në mungesë të një Spitali Psikiatrik ligjor ka bërë që rreth 120 të sëmurë mendorë të mbahen në burgun e Zaharisë në Krujë.
Manjani është shprehur se në këtë burg nuk mund të qëndrojnë më asnjë i burgosur që ka probleme mendore, pasi nuk është vend i përshtatshëm për ta.
Ministri Ylli Manjani bëri të ditur se në të gjitha burgjet e vendit vuajnë dënimin rreth 500 të sëmurë mendorë, prej të cilëve 189 rezultojnë të sëmurë që përpara dënimit, ndërsa pjesa tjetër ka shfaqur probleme gjatë qëndrimit në qeli.
“Nuk kemi trajtim të specializuar mendor në burgje. 189 janë dënuar nga gjykata me detyrim për tu mjekuar, nuk duheshin vendosur në burgje. Nuk na vijnë mjekë të specializuar për të sëmurët mendorë në burgje. Është përgjegjësi e drejtuesve të burgjeve të krijojnë mjedis njerëzor.”- deklaroi Manjani. Sipas Manjanit, është rënë dakord me ministrin e Shëndetësisë që të sëmurët mendorë të burgjeve të trajtohen në spital.
