Kryetari i Bashkisë së Tiranës, Erjon Veliaj ka marrë pjesë sot në aksionin për pastrimin e kryeqytetit. Por Veliaj e ka nisur këtë aksion nga varrezat e Sharrës, ku po pastronte varret e të vdekurëve.
Por kryebashkiaku që po kujtohet për ata që na kanë lënë, duket se po harron ata që janë gjallë. Në zonën e Paskuqanit, në Don Bosko, në Selitë, në Kombinat dhe disa zona të tjera të Tiranës situata është dramatike. Ata që janë të gjallë sot, rrezikojnë të kthehen të vdekur nesër nëse shteti nuk i jep ndihmën e nevojshme.
“Siç kemi një qytet të të gjallëve, kemi edhe një qytet të atyre që s’janë më, kjo është simbolika pse aksionin e pastrimit e filluam nga varrezat e Tiranës, që sot janë shumë herë më të pastra. Në varrezat e Sharrës do të vazhdojmë me një investim, si në Tufinë, për të pasur një hapësirë të këndshme, ku qytetarët të kenë kohë për të kujtuar të afërmit e tyre, në një ambient higjienik dhe shumë herë më estetik se sa ai që kemi sot.”- tha Veliaj.
Kryebashkiaku Veliaj deklaroi se në dhjetor do të nisë punën edhe kompania publike, një bashkëpunim mes Bashkisë së Tiranës dhe Bashkisë së Veronës, për pastrimin e kryeqytetit, ndërkohë që janë porositur edhe mjete të tjera me qëllim përmirësimin e kushteve. Por ai nuk shpjegoi, përse ishte shtyrë nisja e këtij bashkëpunimi e cila ishte parashikuar në muajin shtator.
“Në muajin dhjetor kompania publike, bashkë me Bashkinë e Veronës, do të fillojë operimin në Tiranë. Kemi porositur edhe disa mijëra kosha dhe disa dhjetëra mjete të tjera. Nuk po kursejmë asgjë, që të administrojmë me sukses ato që ka në dorë bashkia. Ashtu si në një familje nuk është detyra vetëm e nënës nikoqire që të pastrojë, por secili duhet të kontribuojë”, tha Veliaj.
Nga Boldnews.al
