Katër shkodranët që u kërcënuan me armë nga shefi i krimit Ekonomik në policinë e këtij qyteti janë arrestuar nga policia.
Ndërkohë ndaj Pjerin Lazrit që nxori pistoletën e tij të punës, duke kërcënuar tregtarët nuk është marrë asnjë masë.
Sipas Policisë së Shkodrës personat e arrestuar kanë kundërshtuar me dhunë punonjësit e antikondrabandës dhe të policisë gjatë kryerjes së detyrës.
Por policia nuk shpjegon se çfarë mase ka marrë ndaj Lazrit që mëngjesin e djeshëm shkeli ligjin.
Policia tha se pas hetimeve ka arrestuar 4 persona: Arjan Halili, 30 vjeç, Marjan Palalej, 35 vjeç, Denis Zefi, 24 vjeç dhe Astrit Muçaj, 39 vjeç, të gjithë banues në Shkodër
Policia thotë se dosjet ndaj tyre janë dërguar në Prokurorinë e Shkodrës, për akuzat e “Kundërshtim i punonjësit që kryen një detyrë shtetërore ose një shërbim publik” dhe “Kundërshtim i punonjësit të policisë së rendit publik”.
