Pas masave ekstreme të sigurisë të ndërmarra dhe të publikuara nga Policia e Shtetit, që në momentin e mbërritjes së kombëtares izraelite dhe deri në përfundimin e takimit dhe largimin e tyre nga Shqipëria, Federata Shqiptare e Futbollit ka bërë një deklaratë për shtyp duke tentuar të qetësojë situatën, duke thënë se gjendja po dramatizohet më shumë seç duhet.
Deklarata e zëdhënësit për shtyp, Tritan Kokona
“Dua të ndaj një shqetësim të FSHF-së në lidhje me ndeshjen që do të zhvillohet nesër këtu në “Elbasan Arena” mes Shqipërisë dhe Izraelit. Po flitet për një siguri tepër të ekzagjëruar, por ne jemi në stadium dhe siç po e shikoni vetë, nuk ka asnjë numër të tejkaluar forcash policie. Janë vetëm 2 policë këtu përpara te hyrja e stadiumit.
Vazhdon shitja e biletave normalisht, vazhdon konvertimi i biletave normalisht dhe gjithçka po shkon sipas parametrave të parashikuara prej nesh. Nuk ka asgjë për t’u shqetësuar. Nuk do të ketë regjime kaq problematike të policisë. Ndërkohë në lidhje me biletat dua të falenderoj për mirëkuptimin qytetarët. Ju ftojmë të gjithëve në stadium të mbështesim kombëtaren sa më shumë dhe shpresojmë të arrijmë rezultat pozitiv.”