Presidenti i Republikës, Bujar Nishani, pritet të thërrasë pasditen e sotme, rreth orës 18:00, Këshillin e Sigurisë Kombëtare për situatën e kanabisit.
Siç ka njoftuar vetë Kreu i Shtetit, kjo mbledhje do të ketë në fokus situatën e kultivimit të kanabisit, fenomen që Presidenti Nishani e ka cilësuar si mjaft shqetësues. Në Këshillin e Sigurisë, përveç Presidentit, janë anëtarë Kryeministri, ministri i Brendshëm, ai i Jashtëm, ministrja e Mbrojtjes, ai i Financave dhe ministri i Transporteve.
Gjithashtu, në këtë Këshill, marrin pjesë edhe kreu i Shërbimit Informativ, Kryeprokurori dhe Drejtori i Përgjithshëm i Policisë.
Kryeministri Rama ka bërë të ditur se nuk do jetë prezent në këtë mbledhje, pasi ndodhet në New York të Shteteve të Bashkuara, ku ka çelur një ekspozitë me pikturat e tij, në galerinë “Mariana Goodman”.
