Zgjedhja e Donald Trump, president i SHBA do të vendosë në rrezik marrëdhëniet me Europën ka paralajmëruar Zhan Klod Junker, president i Komisionit Europian.
Në një seri etiketimesh për fituesin e zgjedhjeve në SHBA, Junker e akuzoi presidentin e zgjedhur për injorancë dhe se ai duhet mësuar “çfarë është Europa dhe si funksionon ajo”.
Duke folur para studentëve në një konferencë në Luksemburg, presidenti i KE-së tha: “Zgjedhja e Trump vendos në rrezik marrëdhëniet ndërkontinentale në themel dhe në strukturë.”
Vërejtjet reflektojnë tronditjen e thellë që përjetuan europianët pas zgjedhjes së Trump, që më herët ka folur mirë për presidentin rus, Vladimir Putin dhe ka vënë në dyshim parimet e mbrojtjes kolektive në NATO.
Komentet e Junker janë në kontrast me disa reagime më diplomatike, të liderëve europianë, të cilët kanë thënë se do të bashkëpunojnë me presidentin Republikan.
Por Junker gjithashtu paralajmëroi pasojat e dëmshme që do të kenë deklaratat e Trump në çështjet e sigurisë. Ai po ashtu kujtoi një thënie të Trump, që la të kuptohej se ai e dinte Belgjikën, shteti ku është vendosur Shtabi i Përgjithshëm i NATO-S, një qytet.
“Ne do të na duhet t’i mësojmë presidentit të zgjedhur çfarë është Europa dhe si funksionon ajo” tha Junker duke shtuar se amerikanët zakonisht nuk kanë pasur interesa në Europë.
“Mendoj se do të na duhen dy vjet, para se Zoti Trump të vizitojë ato vende që nuk i njeh mirë”.
