Edhe pse 2 ditë më parë Shqipëria mori rekomandimin për hapjen e negociatave të anëtarësimit me Bashkimin Evropian, gjithçka do të vendoset në fillim të muajit tjetër, gjatë takimit të ministrave të jashtëm të vendeve anëtare.
Kushtet e vendosura nga Këshilli i Eurpopës në rekomandimin pozitiv, si dhe mungesa e një date në tekstin e progres raportit e bëjnë edhe më komplekse situatën duke u nisur edhe nga acarimi i marrëdhënieve me Greqinë, kohët e fundit.
Për këtë çështje duke ju referuar burimeve diplomatike, gazeta Kathimerini shkruan sot se asgjë nuk është e sigurt për Shqipërinë dhe se gjithçka do të vendoset në takimin e ministrave të jashtëm të vendeve të BE-së, ku edhe fqinji ynë do të ngrejë disa çështje pezull që ka me vendin tonë.
Sipas gazetës, qeveria greke është e vendosur të hedhë në tryezën e diskutimeve një sërë çështjesh në raport me Shqipërinë, me fokus kryesor vendimin për prishjen e 19 objekteve në Himarë, shkruan Syri.net.
“Në Athinë perspektiva e një vetojë nuk është aspak e dëshirueshme, por burime lënë të nënkuptohet se nëse Shqipëria nuk do të tregojë me vepra vullnetin për fqinjësi të mirë, veto do të vendoset për aq kohë sa do të konsiderohet e domosdoshme”, thekson e përditshmja Kathimerini.
