“Tenderat në shëndetësi i merr kushëriri i Petrit Vasilit”. Kështu akuzonte PS-ja në vitet 2010-2012, kur ishte në opozitë. Dhe bëhet fjalë për kompaninë farmaceutike “Megafarma” që rezultonte në atë kohë të merrte pjesën më të madhe të tenderave në sektorin e shëndetësisë.
Sot, qeveritë kanë ndryshuar, por monolopet jo. “Megapharma” edhe sot merr pjesën më të madhe të parave nga buxheti i Ministrisë së Shëndetësisë së drejtuar nga Ilir Beqaj.
Sëfundmi janë publikuar shifrat e tenderimeve të kryera nga ky dikaster dhe spitalet më të mëdha në vend, ku rezultoi se në “top-list” është Megpharma. (tabela)
ë dhënat e publikuara nga “Open Procurement” i përkasin 9-mujorit të parë të vitit 2016. Kështu, për 9 muaj, në sektorin e shëndetësisë janë kryer 4 119 tendera, me një fond që në total shkon 6.72 miliardë lekë.
Vihet re se janë 10 kompani kryesore, që marrin pothuajse të gjithë tenderat, ose në gjuhën e shifrave marrin 46.9% të totalit, të vlerës së kontratave.
Në krye të tyre është “Megapharma” me administrator Rasim Hamzaraj, që ka fituar 352 tendera me vlerë 452 milionë lekë (të reja).
E dyta në listë është Rejsi Farma me 355 milionë lekë (të reja), e ndjekur nga Devis shpk në vend të tretë me 313 milionë lekë (të reja).
Më pas lista vazhdon me Montal shpk me 305 milionë lekë, Food Catering- Helios 298 mln lekë, Pegasus shpk 294 mln lekë, Biometric Albania, 278 milionë lekë, Montal shpk, 271 mln, Gjikuria shpk, 222 mln dhe GTS shpk me 187 milionë lekë.
Ja çfarë deklaronte PS kur ishte në opozitë (viti 2010)
Gjatë interpelancës me Ministrin e Shëndetësisë, Petrit Vasili, deputeti i PS, Eltar Deda, ka akuzuar Vasilin se fituesit e tenderave në spitale bëhen sipas preferencave të tij klientaliste. Deputeti Deda, përmendi kompaninë Megafarma, e cila sipas tij është fituesja e tenderave në spitale. Më tej Deda theksoi se kjo kompani fsheh “korrupsionin e 2 ministrave”. Pronari “Megafarmës” është një zotëri i cili quhet Rasim Hamzaraj dhe Rasim Hamzaraj është ai njeri i cili ka blerë pasurinë e ministrit tjetër të kësaj qeverie z. Dritan Prifti dhe me një pasuri prej 1.8 mln euro”, tha Deda.
/opinion.al/
