Atleti David Nikolli ka bërë publik një denoncim, duke pretenduar se është përballur me pasoja pas pjesëmarrjes në protestat që prej 21 ditësh zhvillohen para Kryeministrisë, ku qytetarë të ndryshëm kërkojnë largimin e kryeministrit Edi Rama dhe qeverisë.
Përmes një videoje të publikuar në rrjetet sociale, Nikolli deklaron se është larguar nga puna për shkak të përfshirjes së tij në protestë.
Ai shprehet se do të ndjekë të gjitha procedurat ligjore për të kundërshtuar vendimin dhe për të mbrojtur të drejtat e tij.
Nikolli thekson se është kampion i Ballkanit me tetë medalje, mban 12 rekorde kombëtare dhe se vetëm pak ditë më parë është shpallur kampion kombëtar në dy disiplina të atletikës.
Sipas tij, pavarësisht rezultateve sportive, i është hequr puna në sektorin shtetëror dhe nuk po i njihen meritat sportive për shkak të pjesëmarrjes në protestat qytetare.
Ai paralajmëroi se së bashku me përfaqësuesit e tij ligjorë do të ndjekë të gjitha rrugët e parashikuara nga ligji për të kërkuar rivendosjen e të drejtave të tij.
Në përfundim të reagimit, Nikolli u shpreh se nuk do të tërhiqet përballë asaj që e konsideron presion, duke shtuar se “njerëzit e lirë nuk mund të frikësohen”.
“Jam këtu të denoncoj maskarallëkun e radhës së pushtetit. Unë si kampion që kam përfaqësuar vendin tim me krenari dhe kam dhënë gjithçka në sport, sot përballem me këtë padrejtësi.
Jam kampion i Ballkanit me 8 medalje, kam 12 rekorde kombëtare dhe vetëm pak ditë më parë fitova kampionatin kombëtar shqiptar në dy gara.
Më hiqet puna shtetërore dhe nuk më njihen titujt vetëm sepse kam dalë të protestoj me të rinjtë si qytetar i lirë.
Këto padrejtësi ndaj meje dhe ndaj të rinjve do të dënohen ligjërisht bashkë me avokatët e mi. Do të ndjek të gjitha rrugët ligjore për të mbrojtur të drejtat e mia. Mos u shqetësoni, koha do t’i rregullojë të gjitha. Njerëzit e lirë nuk mund të frikësohen”, u shpreh ai.
