Deputeti i Partisë Demokratike Aldo Bumçi ka reaguar pas lajmit të shpërndarë nga Partia Socialiste se Partia Demokratike ka kërkuar nga Komisioni Europian që të mos përcaktojë datën për hapjen e negociatave për anëtarësimin e Shqipërisë.
Në një prononcim për News24, Bumçi ka hedhur poshtë të gjithë këto pretendime, duke sqaruar se amendamenti i dorëzuar nga opozita shpreh shqetësimin për blerjet e votave në zgjedhje, moszbatimin e ligjit për Dekriminalizimin, kultivimin e kanabisit dhe zbatimin e reformës në drejtësi. Sipas tij, PD nuk ka kërkuar që të mos ketë datë për hapjen e negociatave, pasi kushtet i vendos BE dhe jo opozita.
“Situata është shumë e qartë dhe e thjeshtë. Kushtet Shqipërisë nuk ia ka vënë PD, por BE. Sot u diskutua për zgjedhjet, luftën kundër drogës. Çështja e datës është një demagogji. Data për hapjen e negociatave varet nga kushtet, dhe kur të plotësohen kushtet, vendoset data. PS po shkakton një tymnajë për datën, po theksoj se kushtet i vendos EB dhe jo PD. Çdo interpretim tjetër është i gabuar.
Ne si opozitë kemi ngritur shqetësimet që kemi ngritur gjithmonë. Nuk mund të shkohet në BE pa zgjidhje të lira e të ndershme, nuk mund të shkosh në BE pa zgjidhu problemin me kanabisin, nuk mund të shkosh duke kandiduar persona me të shkuar kriminale. Kur Shqipëria të plotësojë kushtet që ka vendosur BE, atëherë do të na japë përgjigje për hapjen e negociatave.
Por kryeministri thotë se integrimi është një udhëtim brenda përmbushjes së standardeve. Ndaj kryeministri të dalë e të thotë nëse kjo Shqipëri ka më pak krim, nëse kjo Shqipëri ka më shumë punësim. Këtë ta thotë kryeministri”, u shpreh Bumçi.
