Nga Boldnews.al
Lëvizja Socialiste për Integrim ka mbyllur sot procesin e saj zgjedhor për kreun e ri të partisë.
Por askush nuk e ka marrë seriozisht këtë proces, pasi LSI-ja tashmë është kthyer si një sekt familjar, ku çdo vendim, që nga e ardhmja e koalicionit e deri tek emërimet më të thjeshta të militantëve duhet të kalojnë më përpara nga çifti Meta-Kryemadhi.
A nuk ishte qesharake të shikoje Monika Kryemadhin të dilte në takime mbështetëse me kandidatin Shezai Rrokaj?
Dhe ky i fundit duke mos pasur asnjë platformë për drejtimin e partisë (pasi e dinte se ishte kandidat kukull) delironte duke deklaruar se LSI-ja do të dilte parti e parë në zgjedhjet e ardhshme.
Të njëjtën gjë përsëriste edhe kandidati tjetër Përparim Spahiu, por me tone më të forta, ku gjatë gjithë fushatës së tij vetëm sulmoi qeverinë. Por edhe ai përveç kritikave nuk kishte asnjë platformë, duke treguar qartë se ishte në këtë garë vetëm për të dhënë disa mesazhe në emër të Ilir Metës.
Dy rivalët e Metës do të shpërblehen nga Meta për këtë “sakrificë”, por pyetja është se pse LSI-ja kishte nevojë për të zhvilluar këtë farsë?
Pikësëpari për të treguar se LSI-ja është një forcë demokratike, ku brenda saj zhvillohen zgjedhje, ashtu siç nuk ndodh te Partia Socialiste, ku Edi Rama nuk pranoi zgjedhje për kreun e partisë, çka solli largimin nga selia rozë të Ben Blushit dhe Mimoza Hafizit.
Por kjo nuk është goditja e vetme që LSI-ja i jep Ramës me zgjedhjet brenda partisë, pasi synimi kryesor i Ilir Metës është pikërisht posti i kryeministrit në zgjedhjet e ardhshme parlamentare.
Duke përdorur kandidatin Përparim Spahiu dhe deri diku Shezai Rrokaj, aleati kryesor i Partisë Socialiste në qeveri, Ilir Meta, ka kërkuar një ridimensionim të marrëveshjes politike me Partinë Socialiste duke lënë të kuptohet qartë dhe pa ekuivoke se do të kërkojë postin e kryeministrit.
Por jo vetëm kaq.
Meta ka kërkuar edhe largimin e një pjesë ministrash që nuk shikohen me sy të mirë nga ai vetë ku në radhë të parë janë: Ministri i Brendshëm Saimir Tahiri dhe Ministri i Jashtëm Ditmir Bushati.
Pra, të dy rivalët formalë të Metës në LSI ishin në garë vetëm për të përsëritur këtë kërkesë.
Dhe nën arsyetimin se elektorati i LSI-së ka kërkuar postin e kryeministrit, Meta do t’ia kërkojë zyrtarisht postin Edi Ramës.
Ilir Meta iu shmang sot një përgjigjeje sesa do të ndikojë në vendimin për koalicionin, pesha e votave që do të marrin dy rivalët e tij, të cilët kërkojnë që LSI-ja të caktojë kryeministrin në zgjedhjet e ardhshme.
Këtë çështje Ilir Meta e ka përfshirë në axhendën politike të vitit tjetër kur do të takohet me Edi Ramën për koalicionin e ri të majtë.
Të gjitha këto kulisa e bëjnë të pasigurtë marrëveshjen e re të koalicionit pranverën e vitit të ardhshëm, ndërkohë që nga ana tjetër lë të hapur vazhdimin e qeverisjes së deritanishme me konflikte dhe frymë të fortë mosbesimi mes palëve.
