Ministria e Punëve të Jashtme të Shqipërisë ka thirrur për sqarim ambasadorin grek në Tiranë pas deklaratës së Ministrisë së Jashtme në Athinë për çështjen e pronave në Himarë.
Në një reagim për mediat, zëdhënësi i Ministrisë së Punëve të Jashtme, Glevin Dervishi thotë tonet kërcënuese të deklaratës dhe njohja e cekët e situatës dhe rrethanave, nuk mund të mirëkuptohen në Europën e sotme, përveçse si një mesazh i destinuar për konsum të brendshëm.
Deklaratat e përseritura të MPJ greke dhe gjuha anakronike për Himarën, sipas Ministrisë së Jashtme shqiptare janë të papranueshme dhe në kundërshtim me parimet themelore të shtetit të së drejtës
“Është rasti të themi se habia pason habinë kur bëhet fjalë për qëndrimet e MPJ greke. Tonet kërcënuese të deklaratës dhe njohja e cekët e situatës dhe rrethanave, nuk mund të mirëkuptohen në Europën e sotme, përveçse si një mesazh i destinuar për konsum të brendshëm. Shqipëria nuk bën dallime në respektimin e parimeve të shtetit të së drejtës.
Procedurat ligjore të ndjekura nga Bashkia Himarë, që kanë në fokus shndërrimin e qytetit të Himarës në një destinacion turistik europian, janë transparente dhe në përputhje me legjislacionin në fuqi.
Deklaratat e përseritura të MPJ greke dhe gjuha anakronike për Himarën janë të papranueshme dhe në kundërshtim me parimet themelore të shtetit të së drejtës. Parime të cilat orientojnë veprimtarinë e institucioneve të shtetit shqiptar. Bazuar në sa më siper e në pajtim me praktikat diplomatike, Ministria e Puneve të Jashtme ka thirrur për sqarime Ambasadoren e Greqise ne Tirane duke shprehur qëndrimin e mësipërm”.
Ditën e sotme banorë të Himarës zhvilluan një protestë për të kundërshtuar projektin urbanistik të Bashkisë, që parashikon shembjen e 19 banesave.
Kryetari i Omonias në Himarë i është drejtuar kryebashkiakut Goro në gjuhën greke, duke i thënë: “Z. Goro jeni krenar që keni ndjekur nga Himara 4 familje deri tani? Sa të tjera doni të ndiqni? Këtë quani ju rilindje?”
Ai u ka bërë thirrje himariotëve të jenë të bashkuar sepse vetëm kështu nuk do të mund askush që t’u marrë tokat e stërgjyshërve.
Banorët thonë se po u zaptohen pronat. Vetë Bashkia nga ana tjetër pretendon se pjesa dërmuese e këtyre objekteve janë të vjetra dhe të pabanuara.
Një ditë më parë, edhe Athina zyrtare shprehu shqetësim për planin urbanistik në Himarë, duke e cilësuar të papranueshme shembjen e banesave të minoritarëve grekë në Shqipëri.
“Po ndjekim me shqetësim të madh atë që po ndodh në Himarë, ku informohemi se 19 familjeve të minoritetit grek u është dhënë 5 ditë afat që të largohen nga shtëpitë e tyre, pasi do të shemben. Autoritetet shqiptare duhet të veprojnë për të anuluar shembjet e banesave.
Mbrojtja e të drejtave të pronësisë veçanërisht ajo e minoriteteve, është një pjesë e 5 kushteve të vendosura nga Bashkimi Evropian për hapjen e negociatave për anëtarësimin e Shqipërisë. Prandaj, në qoftë se Shqipëria dëshiron të anëtarësohet në Bashkimin Europian, duhet të tregojë që vepron si një shtet ligjor duke mbrojtur nga arbitrariteti dhe veprimet e paligjshme të drejtat e të gjithë banorëve pavarësisht kombësisë dhe origjinës”, thuhet në deklaratën e Ministrisë së Jashtme greke.
