Më shumë se 114 grabitje ka kryer një grup shqiptarësh në Itali, brenda dy viteve.Mediat italiane shkruajnë se operacioni i koduar “Selfie”, bëri të mundur zbulimin e një grupi kriminal, hetimet për të cilin kanë nisur në korrik të vitit 2015.
Policia vendase ka njoftuar se në pranga përfunduan ditët e fundit, shqiptarët Bedri Demaj, 31 vjeç dhe Armir Gjecaj, 26 vjeç, përgjegjës bashkë me një të tretë për katër grabitje në janar të këtij viti në Riva Del Garda, ku kanë arritur të vjedhin shuma 20 000, 40 000, 4925 dhe 180 euro, krahas dëmeve materiale të tjera të shkaktuara në 4 shtëpi, të cilat u grabitën brenda pak orësh.
Ndërsa shqiptari i tretë, Ilir Ndrejaj është arrestuar gjatë muajit korrik të këtij viti në Cassano d’Adda, Milano.
“Përpjekja për arrestimin e tyre u bë më 6 janar të këtij, por shqiptarët mundën të arratiseshin, ndërsa makina e policisë u përplas gjatë ndjekjes”, shkruajnë mediat italiane.
Demaj, për të siguruar arratisjen e dy të tjerëve, kishte goditur një polic. Dy shokët e tij kaluan natën në një pyll pavarësisht temperaturave të ftohta.
Më pas policia italiane njofton se Ilir Ndrejaj të nesërmen kishte marrë një taksi dhe ishte kthyer në Riva del Garda dhe më vonë në Milano për t’i shpëtuar ndjekjes.
Pas identifikimit të tij, policia arriti të identifikonte edhe shqiptarin tjetër Armir Gjecaj, i cili kishte një bar në Cassano d’Adda. Pjesë e bandës ishte edhe Dorjan Gjoka, që sipas mediave vendase jeton në Shqipëri dhe kërkohet ekstradimi i tij.
