Në seancën plenare të një jave më parë çështja kryesore që u diskutua ishte largimi i deputetëve Ben Blushi dhe Mimoza Hafizi edhe formalisht nga vendet ku ishin ulur deri dje, mes socialistëvë të tjerë ligjvënës.
Mediat e pasqyruan si distancim natyral të inicuar nga vetë deputetët e pakënaqur.
Por INTv sjell mesazhet e shkëmbyera mes tyre, ku diskutojnë vendimin e marrë për t’i nxjerrë në fund të rreshtit. Mesazhet janë shkëmbyer në një seancë ku Ben Blushi nuk kishte ardhur ende në parlament, ndërsa Hafizi i ankohet se duan t’i spostojnë afër deputetes Mesila Doda, që gjithashtu iu largua Partisë Demokratike për të iu bashkuar PDIU.
Më tej Blushi përpiqet të ngushëllojë Hafizin për gjestin e ulët që kanë bërë socialistët sipas tij duke e lëvizur nga vendi që mbante prej 3 vitesh në Kuvend.
Por duket se inatet brenda PS janë edhe më të thella me dy të ikurit, pasi Hafizi aludon se do ta marrë fjalën në foltoren e kuvendit vetëm kur të doje Valentina Leskaj që drejtonte atë ditë seancën.
Edhe pse në media u fol se Blushi dhe Hafizi u larguan nga kolegët socialistë për të përligjur edhe largimin nga PS, në të vërtetë nuk ka ndodhur kështu.
Ikja e tyre u shoqërua edhe me reagimin e shumicës që preferoi t’i kishte larg grupit të deputetëve edhe si karrige jo vetëm si mendim.
