Një pikë në katër ndeshjet e fundit të kampionatit, humbja e tretë radhazi dhe vendi i 14-të në renditje.
Pasi kanë kaluar më shumë se dy muaj nga kalimi i Frank de Boer në drejtim të Inter-it, bilanci fillestar nuk është aspak pozitiv. Zikaltrit po fundosen gjithnjë dhe më shumë me kalimin e javëve dhe trajneri holandez, pas justifikimeve të fillimit, tani ka përfunduar në bankën e të akuzave.
Besimi ndaj ish-teknikut të Ajax është pakësuar që në ditët e kaluara, kur Kia Joorbachian, menaxheri i trajneri, është vënë në lëvizje nga Suning, që ka filluar kërkimet për një zëvendësues të mundshëm.
Në listën e bërë nga shoqëria kineze, janë tre emra italianë: Guidolin, Pioli dhe Mandorlini, por edhe ish-trajneri Leonardo dhe “i çmenduri” Bielsa, i cili është përfolur edhe në të kaluarën për të marrë drejtimin e zikaltërve.
De Boer, gjithsesi, duhet ta ruajë vendin për ndeshjen e të mërkurës kundër Torino-s: aty do të luajë shanset e fundit, por klubi është vënë në lëvizje për të marrë masat që tani.
