Pas fjalës së ish-deputetes socialiste, Mimoza Hafizi, në foltoren e parlamentit është kundërpërgjigjur ministrja e Arsimit, Lindita Nikolla e cila ka rrëfyer historitë e dy mikeshave që të dyja vijnë nga fusha e arsimit.
“E dashur Moza kemi bërë shaka dikur të dyja bashkë. Qeshje shumë atëherë me atë njeriun që vrapon për të bërë detyrën dhe dikush që fshihet te qoshja e pallatit për të vënë stërkëmbëshin e radhës. Të fokusohemi tek të vërtetat e kësaj pune dhe asaj që po ndodh me arsimin. Po të them dallojmë shumë, dallohet shumë fokusi tek puna dhe tek të vërtetat”, deklaroi Nikolla.
Ai më tej i konsideroi si të pavërteta ato çfarë deputetja tha për arsimin. “Jemi fatkeqësisht ndryshe. Ju për të sharë ministren e Arsimit, dhe ministrja e Arsimit për të zbatuar ligjin. Thatë një të pavërtetë”, iu drejtua Nikolla. Ndërkohë që, gjatë fjalës së saj, Hafizi u ndal pikërisht te prapaskenat e ligjit për arsimin e lartë, i cili sipas saj favorizon universitetet private.
“Thuhet që djalli qëndron në detaje, po në këtë rast shkëlqen hapur në dritën e diellit. Në shkencat e natyrës janë 17 studentë nga 90 të kërkuar… S’ka ndodhur asnjëherë që të kemi kaq pak studentë në vitin e parë. Reformë është kjo? Për të dërrmuar shkencat e natyrës. Do mbushen thotë kryeministri me kë? Me studentët që i detyrojnë të vijnë aty?”- deklaroi Hafizi.
