Kryebashkiaku Erion Veliaj në mënyrë të përsëritur ka mohuar sërish vrasjen tragjike të 17-vjeçarit të ndjerë Ardit Gjoklaj. I ftuar në Top Story, Veliaj aludoi se Arditi mund të mos jetë vrarë brenda kompanisë, ndërsa paturpësisht deklaron se nuk është e sigurtë që kompania “3R” mund të ketë shkelur Kodin e Punës.
“Nuk ka ndodhur në pjesën e konveierit apo në vend tjetër. Kur bie nata në Sharrë është e rrethuar nga ndërtesa informale dhe ku mund të çahet rrethimi i landfillit. Nëse është e vërtetë kompania e ka shkelur Kodin e Punës, atëherë le të mbajë përgjegjësi. Presim nga organet kompetente për të zbardhur ngjarjen.”- shprehet Veliaj.
Por prokuroria nxjerr bllof Kryetarin e Bashkisë së Tiranës, pasi në hetimet që ka bërë, rezulton se 17-vjeçari Ardit Gjoklaj është vrarë brenda kompanisë “3R” nga një fadromë që drejtohej nga një tjetër punonjës, Edmond Kallari.
“Nga veprimet e para hetimore rezulton se shtetasi Ardit Gjoklaj ishte punëtor sezonal në landfillin e Sharrës, i pa regjistruar, por i punësuar nga firma “3R” sh.p.k, e cila është një firmë e nënkontraktuar dhe merret me përpunimin dhe riciklimin e mbetjeve urbane, i cili edhe në momentin e gjetjes së tij ishte i veshuar me rrobat e punës. Ky shtetas kishte 1 muaj që kishte filluar punë.”– shprehet organi i akuzës.
Veliaj vijon me mashtrimin e tij duke thënë se 17-vjeçari ka vdekur shumë larg territorit të kompanisë. “Ajo që na rezultoi është që ngjarja ka ndodhur shumë larg vendit të punës dhe në një orar që nuk ka qenë orari i asaj pune.”– shprehet kryebashkiaku.
Por hetimet e Prokurorisë dhe Oficerëve të Policisë Gjyqësore pranë Komisariatit nr.6 tregojnë të kundërtën e asaj që thotë Erion Veliaj.
“Kufoma eshte gjetur midis mbeturinave ne nje largesi 2.2 metra nga muri rrethues perendimor dhe 5.5 metra nga shtylla e krahut veriperendimor te ketij kapanoni. Nga këqyrja e një mjeti pune ne landfill tip fadromë me ngjyre te verdhë, konstatohet se ai eshte pa targa dhe ky mjet leviz me anë të zinxhireve në të dy krahët, ndersa ne pjesen e përparme ka koven me të cilën bën lëvizjen e mbeturinave.”– vijon më tej Kryetari i Bashkisë së Tiranës.
Ndërkohë analisti Arjan Vasjari duket se doli jashtë pyetjeve të programit, pasi i kërkoi llogari direkte Veliajt lidhur me transparencën e kontratës me kompaninë “3R”.
“Nuk kemi një kontratë me kompaninë “3R” dhe mesa di kjo kompani fitonte rreth 7-8 milion euro në vit. Nuk e kuptoj edhe këtë donacionin që bën deri në 2 milion lekë, ku shihet hapur që ka një abuzim sepse fjala ‘deri’ do të thotë nga 1 lekë deri në 2 milion lekë.”- ishte reagimi i Vasjarit që tërboi kryebashkiakun.
Por Veliaj provoi sërish aferën e fshehtë me kompaninë “3R” duke thënë se i ka dhënë menaxhimin e mbetjeve dhe më pas tregtimin e tyre në kompanitë e riciklimit.
“Bashkia nuk paguan për këtë tender, në një vit janë 350 mijë ton. Dhe ne kemi bërë marrëveshje me kompanitë e riciklimit i kemi thënë hajdeni aty. I ftuam dhe u thamë më mirë merrini në vend aty sesa ta merrni nga çdo kazan sepse kjo nuk ka kuptim, që të kthehet në pikë riciklimi çdo kazan i Tiranës dhe plehrat që shpërndahen më pas nga qentë”- shprehet Veliaj i cili harron se edhe mbetjet në Sharrë janë pronë publike.
