Kreu i qeverisë Edi Rama gjatë një takimi me mësues nga e gjithë Shqipëria u ka dhënë atyre lajmin e mirë se nga data 1 Mars i vitit 2017 do t’u rritet paga me 10%.
Kështu qesja e Qeverisë do të zgjidhet vetëm 3 muaj para zgjedhjeve të përgjithshme.
“Qeveria do vërë në dispozicion 100 milionë USD për ata që janë në fund të fundit edhe arsyeja e reformave si qytetarë por edhe garancia e reformave si punonjës të këtij shteti. 100 milionë usd për të shpërblyer mundin, sakrificat, dhimbjet, në kushtet e sotme janë një mal me para për këtë shtet, por janë në të njëjtën kohë një detyrim moral i patjetërsueshëm, se ne s`mund të vazhdojmë t’u themi njerëzve se sa % po rritet ekonomia, sa investime po bëhen për hërë të parë për rrjetin e furnizimit me energji … Kemi pasur një debat shumë të madh me FMN pikërisht për këtë, se logjika financiare thotë se nuk është ky momenti i duhur, por nga ana tjetër përtej logjikës së ftohtë vetëdija jonë dhe ndjesia shumë e fortë për atë që njerëzit përjetojnë në këtë proces reformash, thotë duhet të shkojmë përtej kësaj logjike të ftohtë dhe njerëzit sot duhet të marrin mbrapsht një pjesë të parë të asaj që meritojnë për atë cka po bëjnë. Rritja e rrogës që ne kemi projektuar dhe do fillojë besoj nga 1 Marsi i vitit tjetër është rritje e drejtpërdrejtë e fuqisë tuaj blerëse. 34 630 punonjës arsimorë të cilët marrin 18 milionë USD nga 100 milionshi i përgjithshëm dhe përfitojnë jo vetëm mësuesit por edhe pedagogët”, tha Rama.
Shefi i Qeverisë lavdëroi punën e ministres Nikolla, teksa e cilësoi: “Një zysh si të gjitha gratë dhe vajzat këtu mundi të bënte në krye të ministrisë atë që një karvan i tërë burrash me grada shkencore nuk e bënë dot kurrë në 20 e kusur vite me radhë. Hynë në atë institucion me grada në kraharor dhe siç hynë dolën duke lënë pas rrënimin e sistemit tonë arsimor”.
