Largimi nga puna i gazetares Alida Tota vetëm se po investigonte rastin e vdekjes së të miturit Ardit Gjoklajt në landfillin e Sharrës ka bërë që deputetët e Partisë Demokratike, anëtarë të Komisionit parlamentar të Medias, të kërkojnë zyrtarisht një seancë dëgjimore me gazetaren Tota. Po ashtu mbyllja e emisionit investigativ “Publicus” që solli fakte të dokumentuara për vdekjen e Arditit dhe punës së të miturve në landifillin e Sharrës janë në qendër të kësaj kërkese nga PD.
Gazetarja Alida Tota, e cila mbante postin e drejtoreshës së informacionit në televizionin A1 Neës, hodhi dritë mbi ngjarjen në landfillin e Sharrës ku rreth 300 punonjës punonin pa sigurime dhe në kushte jo të sigurta për jetën.
Alida Tota u shkarkua nga puna me 18 gusht të këtij viti, vetëm se kërkoi të nxirrte informacionin në zbardhjen e vdekjes së 17 –vjeçarit Ardit Gjoklajt.
Një njoftimin e PD-së thuhet: “Gazetarja Tota bëri një investigim pas vdekjes së Ardit Gjoklajt, ku rezultoi se ishin bërë përpjekje për të fshehur këtë ngjarje, për të humbur gjurmët e viktimës, dhe gjithashtu rezultoi se rreth 300 punëtorë aty ishin të pasiguruar dhe shfrytëzoheshin në kushte skandaloze e të pasigurta për jetën. Kur gazetarja Tota po thellonte këtë investigim dhe i kërkoi zyrtyarisht informacion Erjon Veliajt për këtë aferë skandaloze kriminale e korruptive, menjëherë i erdhi urdhëri për pushim nga puna”.
“Partia Demokratike e konsideron këtë rast një dhunim të rëndë të lirisë së fjalës dhe censurë që ushtroi Erjon Veliajt për të mbyllur gojën e medias mbi skandalin e Sharrës. Largimi i Totës ishte një konfirmim tjetër për përgjegjësinë e drejtpërdrejtë që ka Erjon Veliaj në krimin e Sharrës, ku është zbuluar se përpara Arditit ka humbur jetën edhe një grua pikërisht për shkak të mosrespektimit aty të asnjë norme ligjore e sigurie.
Deputetët e Partisë Demokratike në komisionin e Medias e kërkojnë këtë seancë dëgjimore për të bërë transparencë në lidhje me largimin arbitrar nga puna të zonjës Tota që lidhet me përpjekjet e Erjon Veliajt për të fshehur aferën e tij të paligjshme në Sharrë, ku humbi jetën dhe Arditi 17 vjec”.
“Çeshtja Tota e Publicus nuk duhen harruar!”
GRUPI PARLAMENTAR I PARTISË DEMOKRATIKE
DREJTUAR: KOMISIONIT PËR EDUKIMIN DHE MJETET E INFORMIMIT PUBLIK
KËRKUES: 1/3 E ANËTARËVE TË KOMISIONIT PËR EDUKIMIN DHE MJETET E INFORMIMIT PUBLIK
OBJEKTI: Zhvillimi i një seance dëgjimore me znj. Alida Tota, gazetaren e televizionit A1Neës, e pushuar nga puna me sa duket për shkak të investigimit gazetaresk të skandalit në ladfillin e Sharrës, Tiranë e me përfaqsues të Shoqatës së Gazetarëve Profesionistë.
BAZA LIGJORE: Nenet 32 dhe 36 të Rregullores së Kuvendit të Republikës së Shqipërisë.
Të nderuar deputetë ,
• Opinioni publik u njoh muajin e kaluar me rastin e gazetares Alida Tota, drejtoreshë e Lajmeve në televizionin A1 Neës, e cila u pushua nga puna, pa paralajmërim pas një emisioni investigativ mbi landfillin e Sharrës, ku u gjet i vrarë një puntor 17 vjeçar I quajtur Ardit Gjoklaj, i cili rezultoi pa kontratë pune si dhe dhjetra të mitur të tjerë që shfrytezoheshin në punë të rënda e në kushte informale bashkë me prinderit e tyre. Landfilli bashkeadministrohej nga Bashkia Tirane.
• Zonja Tota në letrën e saj të dt. 19 gusht 2016 drejtuar Komisionit shpjegon se hulumtimi gazetaresk i Departamentit të Lajmeve në A1 Neës zbuloi dëshmi se Ardit Gjoklaj ishte vrarë nga makineritë e landfillit që I shkaktuan dëmtime trupore të rënda . Gjatë investigimit u zbulua se, përfaqesuesit e kompanisë se riciklimit, ne përpjekje për të fshehur krimin e kishin futur viktimën në qese plastike të hedhur ne masivin e plehrave. Dëshmitë ekskluzive zbuluan se, në Landfill-in e Sharrës shfrytëzoheshin mbi 300 punëtorë pa kontrata pune e në kishte shumë të rënda. Pak ditë pas arrestimeve për ngjarjen, Bashkia Tiranë mbylli fshehtas landfill-in dhe dëboi punonjësit që shfrytëzoheshin në “të zezë” duke mos i paguar për punën e bërë.
Znj. Tota sqaron se “në respect të standarteve profesionale, ajo kërkoi dhe qëndrimin e Bashkisë, kryetarit z. Erion Veliaj, përgjegjës për landfillin, të shpjegonte problemet e konstatuara. 24 orë më vonë, më 18 gusht 2016 zonjës Tota, iu komunikua pushimi nga puna. Zonja Tota, përmes letrës drejtuar Komisionit, ku ka bashkëngjitur edhe katër dokumente, paraqet rastin e saj dhe kërkon vëmendje e veprim nga deputetët.
• Shoqata e Gazetarëve Profesionistë, (SHGPSH/APJ Albania) në dt. 20 09 2016, në letrën drejtuar Komisionit të Edukimit e Medias e konsideron arbitrar aktin e pushimit nga punatë zonjës Tota dhe mendon se shkak për të është ndërhyrja politike.” Të tilla ngjarje janë një kërcënim real për lirinë e medias në vendin tonë. Ne protestuam publikisht për këtë rast. Shoqata konsideron se, Komisioni Juaj përgjegjës për median, duhet ta shqyrtojë këtë rast dhe rrezikun për lirinë e medias që ai paraqet.”, thuhet në qëndrimin e SHGPSH. Shoqata shprehet se përfaqsuesit e saj do të ishim të gatshëm të paraqiteshim në dëgjesë para Komisionit, në rast se do të ftoheshin
.
Përsa më sipër, nisur dhe nga objekti I punës sonë, Kuvendi nëpërmjet Komisionit për Edukimin dhe Mjetet e Informimit Publik duhet jo vetëm të njihet dhe të verifikojë këtë kërcënim për lirinë e medias shqiptare , por të mbështesë publikisht gazetarët kurajozë dhe profesionistë. Ne e konsiderojmë të rëndësishme trajtimin e shqetësimeve dhe presionit që u bëhet gazetarëve nga struktura të pushtetit dhe politikës, si dhe konsiderojmë të domosdoshme marrjen e masave për një gazetari të lirë e të pavarur dhe mbrojtjen e gazetarëve.
Në këto kushte, në përputhje me nenin 36 të Rregullores së Kuvendit, ku parashikohet se: “Komisioni është i detyruar të zhvillojë seanca dëgjimore publike me përfaqësues të grupeve të interesit, në rast se një e treta e të gjithë anëtarëve të komisionit e kërkon atë në mënyrë të motivuar me shkrim”, me qëllim marrjen e një vlerësimi të plotë mbi këtë cështje,
KËRKOJMË:
Thirrjen e mbledhjes së Komisionit për Edukimin dhe Mjetet e Informimit Publik, brenda muajit tetor 2016 me këtë rend dite:
“Zhvillimin e një seance dëgjimore publike me gazetaren Alida Tota dhe me përfaqsues të Shoqatës së Gazetarëve Profesionistë.
Kryetari i Komisionit, bazuar në nenin 33 të Rregullores së Kuvendit në këshillim me nënkryetarin e sekretarin e në kontakt me palët e ftuara në këtë dëgjesë, të caktojë ditën dhe orën e mbledhjes së Komisionit
Anëtarët e Komisionit për Edukimin dhe Mjetet e Informimit Publik
1. Bedri Hoxha
2. Luciano Boçi
3. Myqerem Tafaj
4. Eleina Qirici
5. Astrit Veliaj
6. Gjovalin Bzheta
7. Gerd Bogdani
8. Liliana Elmazi
9. Gjergji Papa
