Partia Demokratike ka reaguar pas vizitës së kryeministrit Edi Rama në Beograd dhe deklaratave të tij, të cilat i ka quajtur bajate e groteske.
Kreu i Departamentit të Politikës së Jashtme në PD, Kreshnik Çollaku deklaroi se ‘individi që tregohet me gisht nga e gjithë bota për kriminalizimin e shtetit, për kthimin e Shqipërisë në hambar e dispeçeri ndërkombëtare droge guxon të jepte leksione demokracie’.
Çolaku e cilësoi Ramën si njeriu që dhunon me harbutëri parimet themelore të demokracisë, të drejtën e lirinë e votës, lirinë e të drejtën e fjalës dhe që shtyp median e lirë.
DEKLARATA E COLLAKUT
Sot është një ditë kur kërcet shëmtuar shija bajate e sjelljes groteske e kryeministrit të Shqipërisë në një aktivitet jashtë vendit.
Shumica e shqiptarëve zgjedhin ta përqeshin e përçmojnë me neveri këtë shfaqje megallomane protagonizmi naiv dhe delirant. Por ka disa gjëra që nuk mund të kalojnë thjesht duke përçmuar banalitetin.
Sot është dita të kujtojmë se individi që tregohet me gisht nga e gjithë bota për kriminalizimin e shtetit, për kthimin e Shqipërisë në hambar e dispeçeri ndërkombëtare droge guxon të jepte leksione demokracie.
Njeriu që dhunon me harbutëri parimet themelore të demokracisë, të drejtën e lirinë e votës, lirinë e të drejtën e fjalës, njeriu që shtyp median e lirë, drejtësinë, njeriu që rekruton ose shtyp çdo qelizë të opinionit dhe shoqërisë civile, guxon t’i japë mësim Europës se si duhet të sillet e trajtojë refugjatët.
Miku i afërt e sponsori politik i Elvis Roshit ofendon kryeministrin e Hungarisë Viktor Orban.
Miku i Arben Ndokës tallet e ironizon Johanes Hahn.
Kolegu i Armando Prengës e Mark Frrokut përqesh Greqinë. Avokati i Arben Frrokut, Balilajt, Habilajt nuk mund të flasë përfaqësojë vullnetin e shqiptarëve për t’u bërë pjesë e Evropës. Europa i hedh tej mbetjet dhe ortakët e krimit. Çatuesi i orëve të vona i Vuçiç nuk mund të flasë në emër të Kosovës e të shpallë në emër të shqiptarisë zgjidhjen e çështjeve madhore kombëtare. Nuk mund të përbetohesh për euroatlantizëm ditën e natën të lobosh për takim të nivelit të lartë në Moskë. Asnjë shfaqje prej komiku apo servili në Evropë apo arrogant katundi në Shqipëri nuk e shpëton as rehabiliton qeverinë dhe historinë e tij në qeverisje të shqiptarëve.
Shqiptarët dhe miqtë e saj në bote do ta mbajnë mend si qeverinë më të paaftë e mediokre të kohërave dhe më të zhyturën e të ndoturën me mafien.
Shqiptarët do t’ia japin vendin e merituar në formën e merituar dhe miqtë perëndimorë po ashtu, dhe kjo dite është afër.
