Pas deklaratave të fundit të kryeministrit Edi Rama në konferencën “Policia e Gjeneratës Tjetër” ku akuzoi kreun e PD-së se po hedh baltë mbi uniformat blu të shtetit, ka reaguar Lulzim Basha.
Lideri i opozitës i ka kthyer përgjigje Ramës përmes rrjeteve sociale se policinë e ka kthyer në mbrojtje të kriminelëve dhe të krimit. Basha ka pranuar se në vendin tonë ka policë që duhet të ishin në burg sot por nuk janë pasi i duhen kryeministrit për të ruajtur drogën e miqve të vet.
Ja reagimi i Lulzim Bashës:
“Nuk ka pasur kohë më të vështirë për policinë se këto 3 vite, kur duhej të bënte kujdes të mos i dilte para Emiliano Shullazit, të mos i prishte punë Balilajt, të mos pengonte Habilajt, t’i hapte rrugën vrasësve me pagesë që pret Tahiri në zyrë, të mbyllte sytë kur arratisej Frroku që vrau komisarin Lamaj, të nderonte Rroshin e Bushin, të ishte në shërbim të Ndokës e ti thonte “po shef” shumë banditëve, trafikantëve, vrasësve, të gjithë miq të Edi Ramës. Kur pranoi sot se ka policë që duhet të ishin në burg, nuk e tha pse nuk jane burg: sepse i duhen për të ruajtur drogen e miqve të tij. Prandaj i mori nga burgu ata që policet e ndershëm i kishin futur aty, dhe jua vuri mbi koke si “shefa”. Rama tradhëtoi policinë per pazaret e tij me krimin. Opozita ka 3 vite që lufton me krimin, ndërsa Edi Rama ka 3 vite qe drejton vendin me krimin. Policia, rendi dhe siguria do jenë më mirë pa Edi Ramen”, thekson Basha.
Çfarë tha Rama:
Duke iu përgjigjur kritikave që bën opozita për policinë e lidhur me krimin, Rama tha se “jam munduar të vihem nën lëkurën tuaj dhe ta parafytyroj veten si një punonjës policisë që ndahet në mëngjes nga familja përqafon fëmijët dhe niset në një punë ku gjithçka mund të ndodhe dhe pastaj kthehet dhe është i detyruar të dëgjojë kaq shumë shpifje, kaq shumë akuza, gjëra që skanë lidhje me atë që në fakt ai bën. A ka në Policinë e Shtetit që s’meritojnë të jenë nën këtë uniformë? Që duhet të ishin në burg se e tradhëtojnë këtë uniformë? Patjetër, por a e meriton gjithë kjo trupë që i ka dhënë vendit një shpresë të re se ne mund të bëjmë shtet, që për hir të atyre të cilët i përmenda pak më parë të marrë cdo ditë një pjesë të baltës që lëshohet me furi ndaj gjithë policisë së shteti në kurriz të vet, në asnjë mënyrë jo dhe kjo ma risjellë në gojë atë shprehjen e famshme që thoshte armiku më i madh i policisë s’është krimi por vetmia, që krijon mungesa e mbështetjes …”
