Një histori tepër komike ka ndodhur në Shkodër para ndeshjes së vlefshme për kualifikueset e Kupës së Botës “Rusi 2018” mes Shqipërisë dhe Spanjës.
Fansat shqiptarë të apasionuar pas futbollistëve spanjollë me të cilët kanë dashur të dalin fotografi për t’i pasur kujtim, kanë bërë një gafë që tashmë po bën bujë në mediat spanjolle.
Dy tifozë të Spanjës, të veshur me uniformat stërvitore të ekipit të tyre, kanë qënë para hotelit ku ishte akomoduar përfaqësuesja iberike, dhe në atë moment një grup tifozësh kuqezi i kanë ngatërruar ata duke i kujtuar se janë futbollistë dhe kanë kërkuar të dalin fotografi. Tifozët spanjollë janë futur menjëherë në rol duke u shtirur si lojtarë dhe u kanë falur një kënaqësi momentale fallco fansave shqiptarë.
Ky moment është filmuar nga kamerat e gazetës së famshme “Marca”, gazetarët e së cilës kanë marrë më pas dhe një prononcim nga “futbollistët” e famshëm.
“Ishim në Bari dhe menduam të udhëtonim drejt Shqipërisë për të mbështetur kombëtaren”, shprehet njëri prej tyre.
“Tani është e pamundur të largohemi që këtu, ju e shikoni çpo ndodh”, thotë “futbollisti” tjetër i Spanjës.
