Partia Republikane ka akuzuar ministrin e Brendshëm, Saimir Tahiri se po abuzon me detyrën.
Në një deklaratë për mediat, PR thotë se Tahiri ka sulmuar Prokurorinë e Përgjithshme dhe se ka kaërcënuar median në ceremoninë për mjetet elektrike.
“Ministri Tahiri vazhdon të ndjekë shembullin më të keq të abuzimit me pushtetin, atë të Kryeministrit të vendit. Ministri i Brendshëm flet përpara policisë së depolitizuar dhe sulmon Prokurorinë si bashkëpunëtore me “kazanin”, kërcënon median e lirë si bashkëpunëtore me krimin, sulmon opozitën si armike të policisë. Ky veprim është jo vetëm papërgjegjshmëri por edhe vepër penale.
Partia Republikane u kërkon Kryeministrit dhe Ministrit të Brendshëm që me degradimin e tyre mos të molepsin edhe organe të depolitizuara si Policia e Shtetit. Policia e Shtetit nuk duhet të nxitet të paragjykojë apo urrejë as opozitën, as median e lirë, dhe as prokurorinë”, thuhet në deklaratën e Partisë Republikane.
