Nga Boldnews.al
Teksa kanë kaluar mbi 2 muaj nga ngjarja e rëndë ku 4 persona humbën jetën brenda ambjenteve të Spitalit Amerikan, prokuroria ka vendosur të hesht përpara këtij fakti duke mos nxjerrë asnjë përgjegjës për ngjarjen e rëndë.
Boldnews.al mëson se organi i akuzës ende nuk ka thirrur për të marrë në pyetje administratorin e Spitalit Amerikan, Klodjan Allajbeu për shkak të miqësisë së ngushtë që ky i fundit ka me kryeprokurorin Adriatik Llalla.
Pak kohë më parë një punëtor u dëmtua teksa po punonte në ambjentet e brendshme të godinës së re të Top Channel, në afërsi të zonës së Kasharit. Fatmirësisht punëtori shpëtoi nga aksidenti ndërsa ngjarja në fjalë nuk u përhap në media, por kjo nuk e pengoi Prokurorinë e Përgjithshme të marrë në pyetje administratoren e Top Channel, Vjollca Hoxha.
Por në rastin e Spitalit Amerikan, si rallëherë prokuroria është frenuar për të pyetur administratorin e Spitalit Amerikan edhe pse bëhej fjalë për ngjarjen më të rëndë të regjistruar ndonjëherë në ndonjë spital. Madje edhe hetimet e nisura me vonesë për këtë ngjarje tepër të rëndë kanë lënë jashtë këtë spital privat.
Boldnews.al ka kontaktuar pak ditë më parë edhe familjarët e 2 viktimave por ata janë shprehur se deri tani nuk janë kontaktuar asnjëherë qoftë nga prokuroria por edhe nga Spitali Amerikan. “Ka ardhur për vizitë tek ne vetëm mjekja e Spitalit Amerikan e cila vizitonte Sanijen. Ajo ka ardhur për respekt ndaj familjes tonë ndërsa sot e kësaj dite nuk kemi asnjë reagim nga përgjegjësit e Spitalit Amerikan”- flasin familjarët e të ndjerës Sanije Sulaj.
Burime për Boldnews.al theksojnë më tej se Adriatik Llalla takohet shpesh me mikun e tij, administratorin e Spitalit Amerikan Klodian Allajbeu. Ata janë parë shpesh duke drekuar me njëri tjetrin, madje në një rast Allajbeu ka përdorur fuqinë e tij të reklamave për të ndërhyrë në një media që të mos sulmonin kryeprokurorin.
Por Klodi i “Spitalit Amerikan” siç e njohin të gjithë, ka relata miqësore me kryeministrin Rama, me ministrin e Shëndetësisë Ilir Beqajn, si dhe me pjesën më të madhe të deputetëve të parlamentit. Por lidhja e Allajbeut me politikën ka qënë e hershme. Në kohën kur qeveriste kryeministri Sali Berisha, lulëzoi Spitali Amerikan i cili përfitoi me qindra kontrata shtetërore për shërbime të ndryshme mjekësore përfshirë këtu edhe procesin e dializës.
Shumë incidente që kanë ndodhur në Spitalin Amerikan janë izoluar pothuajse krejtësisht nga mediat vizive apo portalet online. Nga një hulumtim i Boldneës.al rezulton se në gjykatën civile dhe ajo penale janë me dhjetra padi të ngritura nga pacientët ndaj Spitalit Amerikan, por asnjë prej tyre nuk është bërë lajm.
Sanije Sulaj, Anife Mali, Lefter Canaj dhe Dashamir Saraçi humbën jetën brenda Spitalit Amerikan mesditën e 25 korrikut. Shumë pak media raportuan për këtë tragjedi, asnjë shoqëri civile nuk u pa të protestonte për këtë padrejtësi, asnjë zyrtar i shtetit nuk foli dhe sëfundmi asnjë përgjegjës nuk ka për atë që ndodhi.
