Nga Boldnews.al
Kryeministri Edi Rama duket se tashmë e ka bërë rrugë në mosmbatjen e premtimeve, ose akoma më keq në mashtrimet e radhës. Pasi i mashtroi shqiptarët me importin e mbetjeve, tashmë është radha e HEC-ve, më konkretisht të HEC-eve në Valbonë.
Banorët e Tropojës, por edhe aktivistë, industria e turizimit, i kanë kërkuar kryeministrit Edi Rama që të anulojë ndërtimin e hidrocentraleve në lumin e Valbonës.
Për arsyen se me ndërtimin e HEC-eve aty, do të marrë fund njëherë e përgjithmonë turizmi në Luginën e Valbonës, një ndër perlat e vetme turistike të Shqipërisë që ka mbetur ende e paprekur dhe që krenohemi kudo në botë.
Jo më larg se mbrëmë, ish-ministri i Jashtëm Besnik Mustafaji dha një parashikim ogurzi se ccfarë do të ndodhë me Luginën e Valbonës, nëse aty do të ndërtohet hidrocentralet. Sipas tij me ndërtimin e HEC-eve në 20 km lumë, atëherë lumi i Valbonës do të ishte i vdekur.
“Të arrish nga 3500 në 40 mijë turistë, për shkak të asaj Valbone dhe tani të thuash dua të bëj hidrocentrale?! Po pse duhet ta vizitojnë njerëzit tani, për hidrocentralet? Turistët nuk do të shkojnë për të parë një luginë të tharë dhe një lumë të vdekur. Ata thjesht nuk do të shkojnë më”, u shpreh Besnik Mustafaj.
Por duket se edhe këtu kryeministri nuk i dëgjon argumentet dhe as do ta mbajë premtimin e dhënë në fushatë kur erdhi në pushtet, se do t’i rishikonte ose anulonte të gjitha koncesionet e dhëna nga ish-qeveria “Berisha”.
Rama është justifikuar se nuk mund ta prishë kontratën pasi qeveria rrezikon arbitrazhin ndërkombëtar.
Dhe këtë nuk e ka thënë publikisht, por fshehurazi duke iu përgjigjur një komentuesi në Facebook.
Komentuesi: E vërtetë që HEC-et janë firmosur në kohën e Berishës, por kjo nuk mund të jetë alibi për ju…. Shumica ju votoi pikërisht se nuk donte të qeverisej më nga Berisha e vendimet e tij. Ndaj, nëse doni te mbeteni ne histori, duhet te prishni kontratat me përfaqësuesit e HEC-eve ne Valbone, e, madje le ti dëmshpërbleni nga taksat tona, nëse vetëm kjo është zgjidhja. Më mirë të na ikin ca lekë duke mbrojtur Valbonën, se sa të shkojnë ne xhepat e politikanëve… Artistët dhe populli janë bashkë: Mos ma prek Valbonën!
Rama u përgjigj: “Kemi anuluar plot e plot, por jo pasi janë mbyllur kontratat, sepse për një kontratë të mbyllur, shteti duhet të paguajë në arbitrazhe ndërkombëtare shumë më tepër se sa çfarë mund ta imagjinosh në ëndrrën më të keqe”.
Pra, kryeministri ynë e ka memorien e shkurtër. Ka harruar se çfarë premtonte kur kërkonte votat, por tashmë ka zgjedhur rrugën e justifikimit për gjithccka.
Jo më larg se gjatë fushatës elektorale për zgjedhjet vendore, Rama kishte premtuar se si në Valbonë, por ashtu edhe në Vjosë nuk do të ndërtoheshin më hidrocentrale.
Tashmë qytetarëve duket se nuk u ka mbetur rrugë tjetër, por që të dalin të mbrojnë Shqipërinë nga vendimet arbitrare të kryeministrit Edi Rama.
