Pas artikullit të publikuar dje në gazetën “Shekulli” që shkruante për ekzistencën e një raporti sekret të ndërkombëtarëve dhe lidhjet e dy drejtorëve të policisë me trafikun e kanabisit ka reaguar sërish ministri i Brendshëm Saimir Tahiri.
Tahiri nuk i ka kursyer akuzat dhe sulmin ndaj Kokëdhimës, të cilin e ka quajtur llum politik, ndërsa të gjitha çfarë thuhen në artikull i ka quajtur pallavra.
Dikur kolegë dhe pjesë e një grupi parlamentar por tashmë, duket se interesat i kanë ndarë.
“Policia ka reaguar zyrtarisht. Bëhet fjalë për një përpjekje goxha intensive për të përbaltur punën e policisë së Shtetit. Tashmë përveç SHQUP-it hyjnë edhe segmente të caktuara të medias, të cilat kanë guximin të fabrikojnë raporte, herë nga Shërbimi Informativ e herë nga partnerët, të cilat nuk ekzistojnë gjëkundi dhe synojnë përbaltjen e punës së policisë. Gjithsesi nuk doja që këtë ditë ta shpenzoja me pallavra që është mësuar ky cikël llumi politik dhe në disa segmente të medias, ndaj të gjithë atyre që nuk përputhen me interesat politike, personale dhe shpesh herë edhe kriminale”, deklaroi Tahiri.
