Presidenti Bujar Nishani ka lënë të hapur mundësinë e kthimit në Kuvend të ligjit për importin e mbetjeve.
Nishani deklaroi sot se do të zhvillojë një takim me përfaqësues të shoqërisë civile përpara se të vendosë nëse do ta dekretojë apo do ta kthejë për shqyrtim në Kuvend ligjin për plehrat.
Deklaratën ai e bëri në një konferencë për shtyp me Presidentin e Kosovës, Hashim Thaçiqë ndodhet në Shqipëri për një vizitë zyrtare.
“Këshilltarët juridikë janë duke punuar, janë duke përgatitur një takim konsultues me shoqërinë civile. Çështje të tilla madhore që lidhen me interesat e qytetarëve ti fokusojmë në rrugën e zgjidhjes së këtij interesi. Prevalon interesi publik. Edhe duke pasur mundësinë e afateve që kushtetuta parashikon, nuk do ketë zvarritje të mendimit të Presidentit. Për çështje të tilla madhore unë preferoj një konsultë. Më pas do të jetë qëndrimi përfundimtar i Presidentit. Çështje të tilla që kanë ndjeshmëri të madhe të opinionit publik për të cilin jemi të angazhuar për ti shërbyer, është një çështje që duhet trajtuar me sa më shumë kujdes”, u shpreh Nishani. Ndonëse kreu i shtetit nuk u artikulua hapur, fakti që i mëshoi shumë ndjeshmërisë së qytetarëve dhe shoqërisë civile, të bën të mendosh se ai mund ta rikthejë ligjin në Kuvend.
