Mhill Gecaj, mjek i poliklinikës së Kamzës denoncoi në Facebook rastin e një pacienteje që merrej me kultivimin e kanabisit, vetëm 3 kilometra larg Tiranës. Në vend që t’i vinte ndonjë kërcënim nga trafikantët e drogës, mjekut i ka ardhur një procedim penal nga policia. Për t’i mbyllur gojën, apo për t’u hakmarrë për statusin e tij, policia gjeti dy arsye qesharake.
“Procedimi i këtij shtetasi ka nisur pasi ka publikuar të dhëna të pacientëve në kundërshtim me urdhërin e mjekut dhe detyrën e tij si dhe nuk ka dhënë informacion tek organet kompetente mbi mjekimin e shtetases F. I” thuhet në njoftimin e policisë.
Sipas policisë, pacientja me inicialet F.I “është paraqitur dhe ka marrë mjekim, e sëmurë me alergji”.
Ajo ç’ka të habit në këtë histori është fakti se mjeku nuk u kërcënua nga trafikantët apo nga kultivuesit e kanabisit, policia nuk u vu në kërkim të parcelave me kanabis dhe nuk kërkoi bashkëpunim me mjekun ose me pacienten e tij. Në vend të kësaj ka nisur procedimi penal duke tentuar t’i mbyllet goja.
Më poshtë statusi në Facebook i mjekut Mhill Gecaj.
“Para dy ditësh me vjen një paciente me një “dermatit alergjik”! Duke e pyetur për sëmundjen në anamneze e sipër më thotë “punoj në lule”.
Çfarë lulesh i thashë?
“Po në lule o doktor në lule a bar si thonë, si gjithë të tjerët” – tha nga 12 orë. Për të nxjerrë bukën e gojës!”
T’ju them të drejtën në fillim nuk e kuptova!
“Po në përpunim të hashashit o doktor’ – tha!
Dhe kjo nuk punonte larg jo, në territorin e Bashkisë Tiranë, se mos kujtoni larg në Shëngjergj apo diku larg, jo jo afër 3 km në vijë ajrore nga qendra e Tiranës. Imagjinoni që ky popull e shikon të ardhmen e punësimit veç tek kanabisi e droga! Në vend të punishteve të frutave të prodhimeve bujqësore e blegtorale tek fabrikat apo resortet turistike etj etj!”.
