Në puntatën e radhës të emisionit “Públicus” që transmetohet çdo të dielë në orën 20:10 në Vizion Plus, u shfaq materiali filmik “Riciklimi”. Një seri intervistash me personazhe politikë, specialistë, shoqëri civile dhe përfaqësues të institucioneve, zbuluan prapaskenat e ligjit të importit të mbetjeve të votuar një javë më parë në Parlament.
“Públicus” arriti të zbulojë se Shqipëria nuk ka kapacitete për të pritur mbetjet nga vendet fqinje apo të BE-së. Laboratori i shumëpërfolur nga kryeministri Rama rezultoi se nuk kishte ekspertizë dhe as eksperiencë për të kryer analizat e mbetjeve të riciklueshme.
Gjithashtu “Públicus” provoi se qeveria nuk i kishte dhënë mundësi kompanive shqiptare të riciklimit për të bërë menaxhimin e integruar të mbetjeve. Kjo pasi, mbetjet urbane shqiptare do të menaxhohen nëpërmjet koncesioneve që qeveria po u jep firmave të huaja.
Një tjetër detaj i transmetuar në materialin “Riciklimi” kishte të bënte edhe me krijimin e kompanive të reja përgjatë vitit 2014-2016. Kjo tregon se qeveria e kishte paramenduar që të hidhte në publik nismën ligjore që e rrëzoi 3 vjet më parë.
“Publicus”, një format unik televiziv
“Públicus” është investimi profesional i një grupi reporterësh që do të hulumtojnë për të hedhur dritë mbi aferat korruptive, shpërdorimin e fondeve publike, krimin e organizuar si dhe padrejtësitë shoqërore.
Një përvojë direkte në vendngjarje mbi ndodhi e situata të rëndësishme të aktualitetit që tërheqin kureshtjen e publikut, brenda të cilave marrin jetë personazhe me profile komplekse, histori të pazakonta që përcjellin emocione të gjalla e rrëfime ekskluzive.
Bërthama kryesore e këtij grupi që punon vetëm në terren ka qenë sezonin e shkuar pjesë e emisionit “Të Paekspozuarit” në Ora News. I njëjti ekip me prurje të reja dhe me përforcime cilësore ka ndërmarrë sfidën e re për zhvillimin e një cikli dokumentarësh investigativ në Vizion Plus.
Emisioni i parë nisi me “Matura në kaos” kur për herë të parë u zbulua dështimi i institucioneve për të garantuar të drejtën e studimit për maturantët e këtij viti.
Por së shpejti në “Públicus”pritet të shfaqen materiale filmike që do të shkaktojnë reagime të forta qytetare duke sjellë edhe një risi profesionale në mediat shqiptare. Protagonistët shprehen me modesti duke mos dhënë ndonjë deklaratë mbi atë se ç’pritet nga ky format unik televiziv. Sipas tyre do jetë sezoni dhe teleshikuesit që do shprehen për punën e tyre.
Me eksperiencën dyvjeçare tek “Të Paekspozuarit” mbi supe ky ekip do të investigojë përmes një përvoje të drejtpërdrejtë në vendngjarje, në prani të palëve, në kërkim të transparencës, në ndjekje të së vërtetës.
Qëllimi nuk është vetëm të informosh, por përmes raportimit në thellësi, të shpjegosh motivet e vërteta të aktorëve në skenën reale të jetës, të vendimmarrjes, të shpërndarjes së parave publike; të tregosh paaftësinë dhe indiferencën kriminale e të denoncosh përfitimet e pamerituara të plutokracisë në kurriz të shoqërisë e pasurisë publike.
Pra, “Públicus”do t’i shërbejë qytetarëve për zgjerimin e kapaciteteve reaguese…
Më poshtë ndiqni emisionin e plotë “Riciklimi” të transmetuar këtë të dielë:
