Duket se mes Ministrisë së Brendshme dhe ish-deputetit socialist Koço Kokëdhima ka nisur një ‘luftë’.
Pas raportit sekret të publikuar sot nga gazeta “Shekulli” për drogën në vend, ku thuhej se dy drejtorë policie baxhanakë kontrollojnë trafikun dhe madje kanë urdhëruar edhe efektivë të tjerë të mbrojnë këtë aktivitet ka ardhur edhe reagimi i Policisë së Shtetit.
“Lidhur me lajmin e publikuar në Gazetën Shekulli e më pas marrë nga disa media, mbi ekzistencën e një raporti sekret për kultivimin e drogës në Shqipëri, Policia e Shtetit sqaron opinionin publik se ky lajm është tërësisht i pavërtetë dhe një sajesë e qëllimshme për të cenuar integritetin e policisë dhe punën e saj.
Theksojmë se është një lajm tërësisht i gënjeshtërt, për raporte të fabrikuara nga redaksi që kanë si synim vetëm përbaltjen e punës së policisë. Një raport i tillë nuk ka ekzistuar kurrë e as ekziston.
Ky lajm i fabrikuar mbi ekzistencën e një raporti tërësisht të sajuar, fsheh mbrapa interesa personale, politike dhe kriminale.
Rezultatet kundër drogës dhe paligjshmërisë dëshmojnë vullnetin dhe angazhimin e Policisë së Shtetit në këtë luftë.
Nga ana tjetër, besimi i partnerëve ndërkombëtarë te Policia e Shtetit rikonfirmohet pas çdo operacioni të përbashkët antitrafik.
Ky besim është maksimal, falë rezultateve të përbashkëta dhe intensitetit të punës për luftën kundër kultivimit dhe trafikimit.
Policia e Shtetit mbetet në dispozicion të medias për çdo informacion zyrtar, duke i bërë thirrje të mos raportojë lajme të pavërteta e të sajuara që kanë për qëllim vetëm keqinformimin e publikut.
Policia e Shtetit bën me dije se do të ndjekë rrugën ligjore ndaj kujtdo që prodhon, fabrikon dhe sajon shpifje të cilat synojnë prishjen e imazhit të policisë dhe të vendit”, deklaron Policia.
