Ambasada e Shteteve të Bashkuara të Amerikes në Tiranë ka paralajmëruar shtetasit amerikanë në Shqipëri për protestën që ‘opozita organizon ditën e nesërme kundër importit të mbetjeve’.
Megjithëse protestën e ka thirruar AKIP, Aleanca Kundër Importit të Plehrave dhe shoqëria civile, Ambasada shkruan se organizohet nga opozita. Ajo shton në njoftimin e saj se nuk ka të dhëna për ndonjë rrezik, por paralajmëron qytetarët e saj që të jenë vigjilentë. Madje, ambasada shprehet se protesta është kundër importit të mbetjeve jo të rrezikshme.
DEKLARATA
Ambasada e SHBA-së në Tiranë informon qytetarët e SHBA-së se partia opozitare shqiptare po organizon një demonstratë kundër importit të mbetjeve jo të rrezikshme në Shqipëri, të planifikuar për të filluar të shtunën, më 1 tetor, në orën 11:00.
Protestuesit pritet të mblidhen në afërsi të qendrës Tajvan, në Bulevardin Dëshmorët e Kombit, për të shkuar drejt ndërtesës së Kryeministrisë.
Një turmë e madhe e protestuesve është parashikuar që të rëndojë trafikun. Ambasada nuk është në dijeni për ndonjë kërcënim të veçantë kundër qytetarëve apo interesave të SHBA-së. Megjithatë, qytetarët amerikanë duhet të jenë vigjilentë dhe të shmangin çdo demonstratë apo tubime”, thuhet në njoftim.
