Kryetari i Partisë Demokratike Lulzim Basha ka ndryshuar strategji politike duke nisur të kërkojë ndjesë për gabimet e qeverisë “Berisha”.
Gjatë fjalës së tij në çeljen e Akademisë Politike të PD-së, lideri i demokratëve, pranoi gabimet që demokratët bënë në vitin 2013 dhe që i kushtuan rrëzimin nga pushteti, por theksoi se këto gabime janë reflektuar dhe se PD duhet të shkojë përpara për interesin publik.
“Kemi bërë gabimet tona që i kanë kushtuar interesit publik. Gabime që padyshim patën rolin e tyre në rotacionin politik të vitit 2013. Duhet të jemi krenar për çfarë arritëm, por kokëulur, zemërhapur, ti themi shqiptarëve, “po kemi gabuar, kemi reflektuar, le të shkojmë përpara. Çdo ndjesë duhet të jetë e sinqertë dhe në funksion të një aleance të re me qytetarin shqiptar”, tha Basha.
Kreu i PD-së tha më tej se integrimi evropian i vendit është në rrezik dhe e vetmja shpresë për vendin është Partia Demokratike, rinia demokrate dhe opozita shqiptare.
Sipas Bashës, fitoja e demokratëve në zgjedhjet e ardhshme është domosdoshmëri, për të sjellë në pushtet qytetarin shqiptar.
“Shpresa e ndryshimit quhet PD, dhe kësaj shprese i prin rinia demokrate. Shqipëria është në një udhëkryq të rrezikshëm për stabilitetin dhe të ardhmen e saj evropiane. Një udhëkryq të rrezikshëm të shkaktuar nga braktisja totale e rinisë shqiptare e qytetarit shqiptar. Është domosdoshmëri që PD të bëjë gjithçka për të fituar zgjedhjet e ardhshme. Për të sjellë në pushtet qytetarin shqiptar, i cili sot është i braktisur, i tradhtuar nga në kryeministër që mendon vetëm për veten e tij dhe një grusht njerëzish e kriminelësh me të cilët shpreson se do të mbajë pushtetin. Integrimi evropian i vendit është në rrezik. Nuk mund të hapen negociatat për një vend që dhunon zgjedhjet, që dhunon maturantët e tij përmes ligjeve të padrejta e klienteliste, nuk mund të hapë negociatat një vend ku vidhet ditën për diell e natën për hënë. Ku mediat quhen kazanë.”- deklaroi Basha.
Ai theksoi se rreziku që vjen nga kjo maxhorancë është i madh.
“Sa herë që kemi qenë në vështirë, rrugën e gjeti rinia. Aleanca e kundërshtarit tonë politik, me krimin, drogën, është e fortë dhe çimentuar. Rreziku i kësaj shprehet qartë për zgjedhjet dhe stabilitetin e këtij vendi. Aleanca që ne kemi dhe do ndërtojmë, ka prodhuar se sa herë kemi qenë të sinqertë me popullin”, tha Basha.
