Kryetari i Partisë Demokratike Lulzim Basha është rreshtuar sot prerazi kundër importit të mbetjeve në Shqipëri. Dhe për këtë ai bëri dy deklarata të forta.
Fillimisht ai tha se Partia Demokratike ka parashikuar masa konkrete për të parandaluar futjen e mbetjeve për riciklim në Shqipëri. Basha tha opozita do ti kërkojë kreut të shtetit që të mos e dekretojë ligjin. Gjithashtu 28 deputetë të PD-së do të kërkojnë thirrjen e një referendumi për këtë çështje.
“Rruga e vetme është ndalimi i importit të mbetjeve. Ne do bëjmë gjithçka në aleancë me qytetarët që kjo çështje të mbyllet njëherë e mirë. do ti kërkojmë Presidentit për të mos e dekretuar. Do bëjmë gjithçka në Kuvend për të bllokuar për herë të dytë. Do të shikojmë çdo mundësi kushtetuese. Po ushtrojmë edhe ushtrimin e të drejtës sonë për të kërkuar një referendum përmes kërkesës së 28 deputetëve”, tha Basha.
Më pas për të sqaruar edhe qëndrimin e Partisë Demokratike, Basha ka bërë një autokritikë për veten dhe PD-në lidhur me të njëjtit ligj të miratuar nga Partia Demokratike kur ishte në pushtet.
“Është një reflektim personal i imi se ligji që bëmë ne për importin e plehrave ka qenë i gabuar. Por nuk ka pasur interesa korruptive. Unë jam i penduar për vendimin e marrë. Një vend që promovon turizmin nuk mund të kthehet në vend për importin e mbetjeve. Ne atëherë besuam se do të vepronim në favor të interesit publik. Por ngritja e 64 mijë njerëzve ishte shprehje se ne dëgjuam zërin e qytetarëve”, ka thënë Basha.
