Analisti Andrea Stefani në një shkrim për gazetën DITA ka sulmuar Mustafa Nanon pse ky i fundit kërkoi largimin e kryeministrit Edi Rama duke e akuzuar si të korruptuar.
Në një intervistë për Tema Tv, Nano ka thënë se Edi Rama është një kryeministër i korruptuar dhe i kapur peng nga delinkuentët.
Ai i ka bërë apel socialistëve për ta larguar sa më shpejt atë, me hir apo me pahir.
“Misioni i tij ka mbaruar. Rama nuk e ka më në dorë qeverinë. Nuk po qeveris më. Ai duhet t’u hapë rrugë ca të tjerëve”, thotë ndër të tjera Mustafa Nano, i cili kujtojmë gjithashtu se në vitin 2013 kishte bërë thirrje “të gjitha qelbësirat të bashkohen për të rrëzuar Berishën nga pushteti.
Stefani, siç e ka bërë rëndom tashmë, të gjitha kritikat kundër Ramës i cilëson të ardhura nga krahu i Berishës, përfshirë edhe kritikën e Mustafa Nanos.
Ja çfarë shkruan ai: “Kori i shtuar i zërave kundër Edi Ramës sot është, në shumicën e rasteve, i nxitur nga ajo botë që nuk do ardhjen e drejtësisë në Shqipëri. Të largosh sot Edi Ramën, përveç se bie ndesh edhe me bilancin e punëve dhe reformave shtetndërtuese, do të thotë t’i japësh një goditje vullnetit politik për reformën në drejtësi, që është shansi i fundit që Shqipëria të dalë nga këneta e korrupsionit dhe mafias ku e kanë zhytur prej 26 vitesh banditë delinkuentë të politikës. Do të thotë t’i bësh të keqen më të madhe Shqipërisë.
Nëse ka një dramë që përjeton sot Shqipëria është pikërisht fakti që ka akoma në krye të opozitës (largqoftë t’i ketë përsëri në pushtet!) politikanë si Berisha dhe Basha që edhe pse i kanë duart të zhyera me gjak, edhe pse janë deri në fyt të pasuruar me korrupsion, edhe pse e kanë përdhunuar lirinë dhe demokracinë duke e bërë të ngecë, çirren e ngjirren për “dekriminalizim”, për “liri e demokraci”. Ky është avantazhi i pandëshkueshmërisë që këta të pandëshkuar po e shfrytëzojnë në maksimum dhe prej të cilëve, vetëm reforma në drejtësi mund të na shpëtojë”.
Por për ironi, Stefani nuk shkruan asnjë rresht të vetëm për ligjin e mbetjeve, ndërkohë që në kohën kur qeveria “Berisha” synoi ta kalonte këtë ligj, ai ishte në rreshtin e parë të kundërshtarëve, ndërsa në analizën e sotme nuk denjon të shkruajë asnjë rresht, ndryshe nga kolegët e tij.
