Kreu Partisë Demokratike, Lulzim Basha duke folur në emisionin “Opinion”, ka deklaruar se pavarësisht se ligji që mazhoranca e kaloi sonte në Kuvend, u miratua edhe nga qeveria “Berisha” në vitin 2011, PD sot është kundër.
Basha sqaroi se, pesë vite më parë u mendua se ky ishte një vendim i drejtë, por tashmë qëndrimi i PD-së ka ndryshuar.
Kreu i opozitës theksoi se qëndrimi kundër vjen edhe nga mbledhja e gati 65 mijë firmave nga qytetarët për mbajtjen e një referendumi për këtë çështje.
“Qeveria kështu e gjykoi, menduar se bëmë gjënë e duhur në atë moment. Fakti është që ligji kaloi dhe u shfuqizuar nga kjo qeveri. Qëndrimi ynë për ligjin ka evoluar. Afro 70 mijë qytetarë mblodhën firma kundër ligjit”, u shpreh Basha.
Basha kujton se në kohën kur një ligj i tillë u miratua nga qeveria “Berisha” pati debat edhe brenda qeverisë për këtë çështje.
Kreu i PD-së, Lulzim Basha ka theksuar në emisionin “Opinion” se pesha e caktuar e grupeve të interesit për çështje të caktuara ka diktuar vendimmarrje të cilat jo gjithmonë janë apo kanë qenë në përputhje me interesin publik.
