Pronari i tokës ku do të ndërtohet terminali i autobusëve në kthesën e Kamzës kundërshton nisjen e punimeve dhe pretendon se pronën ia kanë njohur 6 vendime gjykate, duke përfshirë edhe atë Kushtetuese. Hajdin Qevani, në një intervistë për Tema TV paraqit dokumentacionin përkatës dhe shpreh shqetësimin e tij për këtë çështje.
Ai ka kontaktuar menjëherë me bashkinë e Tiranës dhe thotë se ka hasur në arrogancë
Deklarimi i Hajdin Qevanit:
Bashkia e Tiranës ka hapur një tender. Me marrjen vesh të këtij lajmi unë direkt i telefonova kryetarit të Bashkisë. Telefonin s’ma hapi. Me mesazh i thashë: z Kryetar, jam një nga trashëgimtarët e pronës, kërkoj një takim urgjent që unë të njihem si pronar i pronës te kthesa e Kamzës. Përgjigje zyrtare nga Bashkia nuk kam fare. Në një takim me drejtoreshën juridike të Bashkisë, përkundrazi, vetëm me prit si qytetar dhe si pronar më ka thënë: Ke mundësi që këtë pronën t’ua shesim firmave të huaja që do të vijnë për ndërtim?. Unë i kam thënë jo. Kundërshtimi jonë me forcë është se bashkia e Tiranës ka qenë palë në të gjithë gjyqet që ne kemi pasur. Është një kalvar i të gjithë proceseve gjyqësore duke filluar që në 2008, që kemi marrë kthimin dhe kompesimin e pronave dhe në janar ka dalë vendimi nr 1 i Gjykatës Kushtetuese që është botuar edhe në fletoren zyrtare. Ky vendim ka marrë formën e prerë që kjo pronë është e trashëgimtarëve dhe të regjistrohet pranë Hipotekës me certifikatë pronësie. Dokumentet i kemi paraqitur edhe në Bashkinë e Tiranës, duke çuar edhe vendimin e gjykatës kushtetuese, por ata nuk e njohin dhe mashtrojnë. Thonë se toka është e jona. Ne çfarë kemi si pronar, pse nuk pyetemi për këtë tender, pse mos jemi dhe ne bashkëpronar në ngritjen e këtij terminali? Ne i kemi thënë bashkisë që këtë e bëjmë ne, firmat i kemi nga Italia, e bëjmë gjithë ndërtimin, ti vetëm eja prit shiritin. Pse të mos pyetemi ne?
