Nga Boldnews.al
Një qytetar ka denoncuar një shkelje të policisë rrugore lidhur me një masë administrative të vendosur për mosmbajtjen e rripit të sigurimit.
Qytetari me incialet E.Gj. tregon se prej disa ditësh po merr një mjekim të fortë për shkak të një dëmtimi në shpatull dhe për këtë nuk ka patur mundësi për të vendosur rripin e sigurimit për arsye të dhimbjeve të forta.
Ai ndodhej sot në rrugën “Perlat Rexhepi” të qytetit të Vlorës me një shpejtësi prej 20 km/orë, ndërsa është ndaluar nga një efektiv i Policisë Rrugore. Ky i fundit i bën me dije qytetarit se do të gjobitet për mosvënie të rripit të sigurimit.
I gjendur përballë kësaj situate, qytetari me incialet E.Gj i tregon efektivit se ka një arsye shëndetësore që nuk e lë të vendos rripin e sigurimit. Qytetari i vë në dispozicion fotot e grafisë së shpatullës së tij të dëmtuar që mban datën 14 shtator, por efektivi i policisë i kërkon në mënyrë absurde një dokument që mjeku të sugjeroj që të mos vendoset rripi i sigurimit.
Edhe pse kërkesa e efektivit të policisë buronte më tepër nga padija sesa “kultura” e tepruar, ai e ndëshkon qytetarin duke e dërguar në Organin Administrativ Shtetëror (OASH) ose siç njihet ndryshe në komisionin e Policisë Rrugore.
“Tani duhet të lë një ditë punën dhe të harxhoj lekët për këtë situatë të krijuar. Unë kam parë në televizione që policia të këshillon dhe në raste të justifikueshme të toleron. Nuk e di se çpo bëhet, kjo është policia që duam?” – shprehet i irrituar qytetari me incialet E.Gj i cili tregon se në momentin e gjobitjes me dhjetra shoferë kanë kaluar pa vendosur rripin e sigurimit.
Boldnews.al ka raportuar më herët për shkelje të Policisë Rrugore lidhur me vendosjen e gjobave për rripin e sigurimit. Dyshime të forta ka se ky aksion mbështetet më tepër mbi përfitimin nga vjelja e gjobave sesa nga një e mirë ndaj publikut.
Në foto grafia e shpatullës dhe gjoba:
