Ekzekutohet urdhër-arresti për dy mjekë të maternitetit Koço Gliozheni ku ndodhi vdekja e nënës dhe fëmijës së saj, në muajin e nëntë të shtatzanisë.
Mjekët e ndaluar janë Helidon Klosi dhe Dritan Deçka, konfirmon policia e Tiranës.
Akuza që rëndon mbi ta është mjekim i gabuar ndaj 35-vjeçares Aida Cajka, e cila ka humbur jetën bashkë me foshnjen në maternitetin “Koço Gliozheni” mëngjesin e 16 shtatorit.
Familjarët e të ndjerës akuzuan shërbimin spitalor, mungesën e mjekëve dhe mos kryejen e ekzaminimeve përkatëse.
Ministria e Shëndetësisë në një deklaratë tha se 35 vjeçarja humbi jetën nga një hemorragji masive në regjionin e shpretkës.
DOSJA E PROKURORISË
Prokuroria e Tiranës ka nxjerrë urdhër ndalimi për dy mjekë të spitalit “Koço Gliozheni”, pasi, në bazë të materialit hetimor të deritanishëm, ata dyshohet se kanë kryer veprën penale “Mjekim i pakujdesshëm”. Urdhri është ekzekutuar mbrëmjen e djeshme.
Në bazë të veprimeve të deritanishme, të kryera nga Prokuroria e Tiranës, rezulton se:
Në datën 16.09.2016 rreth orës 05.00 në Spitalin-Universitar Obstetrik- Gjinekologjik “Koco Gliozheni” është konstatuar vdekja e pacientes A. C. dhe e fëmijës se saj, seksi femër.
E ndjera A. C., e cila ishte në muajin e 9 të shtatëzanisë, është paraqitur në datë 15.09.2016 rreth orës 22:30 në Spitalin-Universitar Obstetrik-Gjinekologjik “Koço Gliozheni” në gjendje të rëndë shëndetësore e shoqëruar nga të afërm të saj. Në vijim, e ndjera është vizituar nga mjekët obstetër gjinekolog, personat nën hetim H. K., N. C. e D. D., të cilët, pasi janë konsultuar ndërmjet tyre, pavarësisht gjendjes së rëndë të pacientes, e kanë dërguar pacienten për një kontroll në QSUT për konsultë kardiologu. Pas vizitës së bërë nga kardiologu, e ndjera është dërguar në SU “Shefqet Ndroqi”, për vlerësim nga pneumologu, ku pas vizitës është dërguar përsëri në Spitalin-Universitar Obstetrik-Gjinekologjik,“Koco Gliozheni” në gjendje shumë të rëndë shëndetësore.
Pas mbërritjes në Spitalin-Universitar Obstetrik-Gjinekologjik “Koco Gliozheni” rreth orës 04.00 ne gjendje shume të rëndë shëndetësore, e ndjera i është nënshtruar ekzaminimeve nga ku ka rezultuar se fetusi (fëmija) ishte i vdekur. Nga mjekët është iniciuar një ndërhyrje kirurgjikale, por shtetasja A. C. ka ndërruar jetë gjate kësaj ndërhyrjeje.
Rreth orës 20.00, date 17.09.2016, Prokuroria e Tiranës nxjerr urdhër ndalimi, për shtetasit: H. K., datëlindja 1969, D. D., datëlindja 1971.
