Ish- ministri Spiro Ksera është dënuar me 1 vit e 8 muaj burg nga Gjykata e Tiranës.
Ksera ishte i akuzuar për shpërdorim detyre dhe vjedhjen e 30 mln lekëve. Togat e zeza kanë vendosur sot se Spiro Ksera do të vuajë dënimin me 1 vit e 8 muaj burg. Mësohet se ish ministri Spiro Ksera nuk ka qenë i pranishëm në momentin kur është shpallur vendimi në gjyq.
Sipas avokatit të Spiro Kserës vendimi është marrë duke mos u vërtetuar akuza për shpërdorim detyre. “Vendimet e marra jashtë gjykatës janë të këtij lloji. Nuk u vërtetua akuza për shpërdorim detyre. Gjykata uli 6 muaj burg”, tha avokati Genc Gjokutaj.
Disa muaj muaj më parë, në 9 Mars, Ksera kërkoi rekurs për lirimin e tij nga burgu ndërkohë që Gjykata nuk e mori parasysh kërkesën e tij dhe la sërish në burg Spiro Kserën.
AKUZA
Sipas Prokurorisë, ish -ministri Spiro Ksera dhe 11 ish -¬vartës të tij janë përgjegjës për vjedhjen e 30 mijë lekëve të rinj, fonde të kësaj ministrie. Paratë e përvetësuara kanë qenë destinuar për pesë aktivitete kulturore dhe sociale për romët, të verbrit dhe fëmijët jetimë në nevojë gjatë vitit 2013.
Gjatë shqyrtimi të masës së sigurisë ndaj tij në Apel para disa ditësh, Ksera pretendoi se po diskriminohej për shkak se i përkiste kombësisë greke. “Nuk kam rrezikshmëri shoqërore. Ju e shikoni. Kam qenë protagonist në zhvillimet shoqërore politike të 20 viteve të fundit. Kjo ndodh nga diskriminimi. Jam i hapur të hetohem, të gjykohem, por jo në burg”, tha Ksera.
