Deputeti socialist Ben Blushi gjatë fjalës së tij në Kuvend ka folur gjatë për zgjedhjet në Dibër, por duke mos kursyer në ironi kryeministrin Edi Rama, kreun e LSI-së, Ilir Meta, si edhe ish-kryeministrin Berisha.
Duke dhënë arsyet e votës së dibranëve, Blushi vuri në dukje se dibranët janë zhytur në varfëri ekstreme dhe se ata nuk votuan të majtën, por qeverinë, kushdo qeveri që të ishte në pushtet.
Kjo sipas Blushit ka ndodhur pasi kishin frikë se mos humbnin edhe atë pak gjë që kanë.
Ndërsa duke folur akuzat e opozitës për blerje votash, Blushi tha se PD-ja nuk është e besueshme.
“Partia Demokratike nuk është aspak e besueshme në atë që thotë. Ata kanë humbur dhe mua më shijon humbja e PD-së, më shumë se leximi i një romani. PD e meriton të humbë si grupim politik i pamotivuar dhe i pavotueshëm. Ajo që më habit mua në rastin e Dibrës, është fitorja e pamerituar e qeverisë. Edhe vetë Rilindja që foli sot për Dibrën, e ka të vështirë të shpjegojë se çfarë ndodhi atje”, tha Blushi.
Blushi tha se as qeveria vetë nuk e di se për kë ka votuar populli i Dibrës.
“Asnjë nuk e thotë që Dibra votoi takimin e Ramës me Mogerinin; reformën në drejtësi; rritjen e prodhimit në Myzeqe; ardhjen e shëndetshme të turistëve të huaj; rritjen e çmimit të naftës në dregun ndërkombëtar. Dibranët nuk kanë votuar, as për të djathtët dhe as për të majtët. Dibranët kanë votuar qeverinë. Populli nuk do t’i dalë kundër qeverisë. Populli do që ta ketë mirë me qeverinë. Populli i Dibrës nuk votoi kundër qeverisë se ka frikë të humbasë edhe atë pak gjë që ka”, theksoi Blushi.
Në fund, deputeti socialist ironizoi tre politikanët kryesorë të vendit. Sipas Blushi, Dibra u shpik nga Saliri (Berisha), u transportua nga Iliri (Meta) dhe u kopjua nga Deliri (Rama).
“Përdhunimi është më praktik se tradhtia. Tre yje shkëlqejnë sot në Dibër. Deliri, Saliri dhe Iliri, që do të vazhdojnë të shkëlqejnë ende për sa kohë shqiptarët janë në këtë galaksi. Dibra është manual zgjedhor, i shpikur nga Saliri, i transportuar nga Iliri dhe i kopjuar nga Deliri”, tha Blushi.
