Kryeministri Edi Rama ka organizuar sot në Dibër një takim falenderues për qytetarët e Dibrës, për votën që i dhanë si kryebashkiaku i ri i qytetit Muharrem Ramës.
“Avantazhi i thellë i votave më shton mua përgjegjësinë para qytetarëve të Dibrës. Gjatë fushatës janë hedhur mbi mua akuza si trafikant, po ku jam trafikant unë, kam punuar dhe vetëm kam shëruar e shërbyer me dinjitet qytetarët e Dibrës. Kanë akuzuar edhe vëllezërit e mi, ka dalë një video që kanë shkuar persona te farmacia sikur gjoja ata japin para, por nuk shiten njerëzit në Dibër. Ata kane kerkuar pune dhe me fitoren time do mundohemi sa më tepër të hapim vende pune. Këto plagë do i shërojme me fillimin e punës sime”, tha kryebashkiaku i ri Rama.
Ndërsa kryeministri Edi Rama tha se kjo ishte fushata më e mirë duke e quajtur atë bio.
“Ishte fushata për t’i dhënë besim dikujt që nuk ishte material importi por ishte bio. Takova gra, burra të moshuar, që prisnin për të gjetur mundësinë të hynin në këtë sallë. Mendoj si ka mundësi që pas një verdikti kaq të qartë dhe një diference kaq të thellë një parti që për kaq shumë vite ka marrë besimin e dibranëve, t’u kthehet dibranëve me atë gjuhë dhe të akuzojë një popull të tërë si të ishin bagëti që dilnin nga parcelat e hashashit dhe jo njerëz familjarë që morën një vendim që është shumë i thjeshtë për tu lexuar. Një parti që pasi sheh që nga numërimi merr vetëm opingën e sheros, i turret dibranëve duke i akuzuar si bashkëpunëtor të krimit. S’dua të lë pa falenderuar edhe ata që pavarësisht se s’votuan Muharremin, morën pjesë në këtë proces demokratik”, tha kryeministri Rama.
