Ministri i Brendshëm Saimir Tahiri ka zbritur sot në terren së bashku me efektivët e qarkullimit rrugor, të cilët po marrin masa ndaj qytetarëve që Nuk vendosin rripin e sigurimit.
Ai tha për mediat se do ta mbështesë Policinë e Qarkullimit Rrugor në këtë nismë të qeverisë, për të ulur ndjeshëm numrin e viktimave të shkaktuar nga aksidentet.
“Kemi filluar sot fazën e dytë të këtij aksionit, që ka të bëjë me zbatimin e ligjit, për të garantuar jetën dhe shëndetin qytetarëve. Kemi bërë shumë për të rritur sigurinë e jetës së qytetarëve në rrugë, por jemi ende shumë të vetëdijshëm se ka shumë hapësira për të bërë punë. Kemi një problem jo të vogël me sinjalistikën rrugore. Por si fillim duhet të merremi me ndërgjegjësimin e qytetarëve për të respektuar kodin rrugor; qofshin këta drejtues mjetesh, apo këmbësor. Kemi një problem me sigurinë në rrugë. Kjo ka të bëjë më të shkuarën, me trashëgimin e asaj që kemi gjetur.
Dikur efektivët e policisë suleshin si karkaleca për të vendosur gjoba, sot ata janë aty për të këshilluar qytetarët dhe të marrin masa drastike për shkelësit e ligjit. Jam këtu për të mbështetur punonjësit e policisë rrugore. Rripi i sigurimit shpëton së parë jetën tuaj dhe jetën e pasagjerëve në makinën tuaj”, tha Tahiri.
