Komisioni Qendror i Zgjedhje deklaroi se deri në mesditë kanë votuar rreth 12% e 57 018 zgjedhësve në Dibër. Por procesi zgjedhor duket mjaft konfliktual. Të dyja partitë e mëdha kanë akuzuar njëra-tjetrën për dhunë e blerje votash.
Fillimisht ishte Partia Socialiste që akuzoi deputetin demokrat Flamur Noka se kishte goditur me pistoletë një qytetar.
Nga e saj, Partia Demokratike raportoi për disa probleme njëherësh.
Sipas PD, banorët e Maqellarës kapën në mesnate duke shpërndare lekë për blerje votash zyrtarin e Drejtorisë se Tatimeve Artan Isaku, vartës i shtetasit Dionis Ymeri, me detyrë Drejtor i Tatimeve për Dibrën.
Më pas selia blu ka akuzuar shefin e krimeve të rënda në Drejtorinë e Policisë Dibër se po shpërndan para në këmbim të votave.
“Admir Trupja, shefi i krimeve të rënda në Drejtorinë e Policisë Dibër, po shpërndan lekë në këmbim të votave me një automjet 6 vendesh ngjyrë gri. PD i bën thirrje prokurorisë të ndalojë në flagrancë shtetasin Trupja. PD i bën thirrje qytetarëve të bëjnë arrestimin qytetar të Admir Trupjes dhe të konfiskojnë paratë e drogës me të cilat po kryen krimin elektoral”, thuhet në denoncimin e PD-së.
Së fundmi, PD ka denoncuar se banorët e zonës Lisham i Epërm kanë bllokuar një furgon që po shpërndante miell në këmbim të votave.
Pas fotos së ish-deputetit Arben Ndoa pranë një qendre votimi, PD publikoi disa foto për të denoncuar shpërndarjen e thasëve me miell në këmbim të votës në fshatin Lishan i Epërm. Sipas PD, banorët kanë parë një furgon që shpërndante miell dhe kanë ndaluar shoferin si dhe kanë sekuestruar sasinë e miellit.
